Shillong, Jymmang 01: Ia ka jingialap ha ka Jylla na ka bynta ka jingai jingkhein dalade ha Meghalaya hapoh ka Census of India 2027 la plie paidbah mynta ka sngi ha Lok Bhavan, kaba long ka sienjam kaba kongsan na ka bynta ka Khana samari kaba nyngkong eh ha ka ri India kaba pyndonkam da ka lad digital.
U Lat ka jylla u C. H. Vijayashankar u la plie paidbah ïa kane ka sienjam da kaba pyndep hi dalade ïa ka rukom ai jingkheiñ dalade ha ka Self-Enumeration Portal, kaba long ka nuksa ïa ki nongshong shnong ha kylleng ka jylla.
U Lat u la ban jur ia ka jingsuk, ka jinglong shai, bad ka jingtreikam jong ka rukom ai jingkhein dalade lyngba ka lad digital bad u la kyntu ia ki nongshong shnong ban iashim bynta shitrhem ha kane ka sienjam.
U la kitbok kitrwiang ïa ka Ophis jong Tnad Census Operations, Meghalaya, da kaba pynpaw ïa ka jingshaniah ha ka jinglah jong ki ban pynlong ïa ka khana samari da kaba thikna, kaba tbit ha ka rukom trei kam bad kaba biang por.
Ka lad ai jingkhein dalade kan plie na ka bynta ki nongshong shnong naduh ka 1 tarik Jymmang haduh ka 15 tarik Jymmang, 2026. Ka rynsan online ka plie lad ia ki briew ban pyndap ia ki jingtip ba bniah jong ka iing ka sem jong ki da kaba suk, ia kaba hadien yn pynshisha da ki nongshim jingkhein ha ka por ba leit sha man ki tyngkong iing.
Ki ophisar kiba la don ha kane ka sngi ki la ong ba kane ka sienjam kadei ka bynta ba kongsan jong ka Khana samari 2027 bad ka pyni ia ka jingangnud jong ka Sorkar ban pyndonkam ia ka teknoloji na ka bynta ban pynbha ia ka jingsynshar bad ka jingthaw ia ki polisi kiba pynshong nongrim ha ki sakhi.
La pynshlur ia ki nongshong shnong ban pyndep ia ka jingai jingkhein dalade hapoh ka por ba la buh ban pynthikna ia ka jinglum jingtip kaba bniah bad kaba lah ban shaniah.
Ka Dr. Pooja Pandey, Commissioner & Secretary sha ka sorkar Meghalaya bad u State Nodal Officer for Census, Biswajit Pegu, Director of Census Operations, Sorkar India, ha ryngkat ki heh ophisar jong ka Tnad Census Operations, Meghalaya, bad Sorkar Jylla ki la iadonlang ha kane ka sngi.
