Ampati, Jymmang 6: U Deputy Commissioner ka South West Garo Hills u lah dep pynbna ba ka jing peit bniah ne eksamin ia ki paidbah na ka jingpang Tuberculosis (TB) and Non-Communicable Disease (NCD) hapoh ka 100 sngi kaba la tip kum ka 100 Days TB Campaign and NCD Screening Programme ka ban sa dang bteng ha kylleng ki tnad sorkar bad ki ophis treikam ha kane ka district haduh u Naitung 2026.
Ia katei ka prokram, kaba la pyniaid da ka tnad ka koit ka khiah (District Health Department) ha ka jing don lang kiwei ki tnad treikam, kynthup ia ka jing eksamin ia ki paidbah na ka bynta ka jingpang Tuberculosis ne TB, ka BP ne hypertension, shini bad bampong khnang ba yn sdang lap noh kloi ia kine ki jingpang bad ban ioh ai jingiada ha ka por ba biang.
Katkum ka jing kren jong u Deputy Commissioner, la ong ba ka daw ba la pynlong ia kane ka prokram ka dei na ka bynta ban ioh jingiada noh kloi kloi ha ki jaka sumar bad ban pyn duna ia kum kine ki jait jingpang. Ka jing lap noh kloi ia ka jingpang TB bad kiwei kiwei ki jingpang ia bit ka long kaba donkam na ka bynta ban ioh dawai noh mar mar bad ban iada na kino kino ki jingpyn wit.
Ki heh sorkar ki la pynbna ba ki tnad treikam kiba shen kin sa pyndep noh ia ka bynta ba nyngkong jong ka jing eksamin ha kine ki taiew ban wan. Baroh ki tnad treikam ba halor ki la dep kyrpad ban pyn tikna ba baroh ki ophisar bad ki nongtrei ki dei ban don lang ha ki tarik ba la buh bad ban ai jing kyrshan ia ki kynhun ka tnad treikam ka koit ka khiah.
Ka District Administration ka la ban jur ba baroh ki nongtrei ki dei ban iashim bynta shit rhem lang ha kane ka prokram bad kit khia na ka bynta ban pyn biang ka rukom treikam ha ka liang ka koit ka khiah.
Ka ophis treikam ka la shim khia ban kut jingmut ban pyn bun ki jaka ai jing sumar bad ban pyn long ia katei ka district kum ka district ba duna ka jingpang TB ne TB-free district.
