Damas, Jymmang 18 : U Myntri Rangbah ka Meghalaya Conrad K Sangma mynta ka sngi 18/Jymmang/2026 ula ong ba ka Sorkar kala trei ia ki kam da kaba buh ia ki paidbah hakhmat eh jong ki kam pynroi. Haba kren ha ka jingialang ha Damas.
U Myntri Rangbah u la kdew ia ki kam thymmai ha social media ba pynphriang ia ki khubor lamler bad ialam bakla ia ki paidbah da kaba pyrshang ban shim burom ia ki kam pynroi bala leh da ka Sorkar ba ialam da ka NPP.
Ula ong ba kine ki juh ki briew ba leh politics kila pynphriang ia ki jingtip ba bakla ban kynthoh pyrshah ia ka Sorkar halor ki kam ki bym lah ban pynbeit da ki snem hynrei la lah pat ban pynbeit khatduh da ka Sorkar ba ialam ka NPP.
“Ngi kum ka Sorkar ngi la buh ia ka bha ka miat ki paidbah hakhmat eh jong ki kam pynroi bad ngi la trei na ka bynta ka jingmyntoi kaba bha eh na ka bynta ki briew jong ngi. Ngi la buh ia ka hok jong ki padibah trai ri trai muluk ha ka bynta ba hakhmat duh” ula bynrap.
Haba kren halor ki jingjia bapher bapher kiba la tynjuh ia ka Sorkar, ula ong ba ka Sorkar ba ialam daka NPP kala bat skhem ia ka nongrim ba kan nym pyni bor bad kam pat ju pyndonkam bakla ia ka bor pyrshah ia u paidbah.
“Ngi la bat ia ka nongrim ban nym pyni bor ha man ki jingjia. Namar jong ngi, ki paidbah ki iai don hapdeng eh ha ka mat treikam jong ngi na ka bynta ka roi ka par”.
Ula ong ba ka Sorkar ka ngeit ha ki jingiakren bad jingiasyllok, bad ym ka jingpyndonkam ia ka bor ban pynsngap jar ia ki sur. “Ngi kwah ban wanrah ia ka lynti ban pynbeit ia baroh ki jingeh. Ngi ngeit ha ka jingsngap bad jingiakren bad ki briew jong ngi”.
“Ngi ieid ia ka Jaidbynriew bad ngim kwah ban iohi ia ka jingia ba sngewsih, ngi iadon beit hangtei ban ialam ia ka imlang sahlang da ka jingieid bad ka jingsngewlem”.
Ha ka por ba mih ka jingeh ba iadei bad ka GHADC, u pyntip ba ka Sorkar kala jubab ia baroh ki Sengbhalang bad ki paidbah baroh. “ Ngi burom ia ka jingsngew jong ki briew jong ngi bad ngi la jied ban rai ia kaei kaba ki paidbah ki kwah da kaba pynlong kongsan ia ka syrnot ST ha ka ban iakhun ia ka elekshon GHADC”.
“Kila don ki jingiakhih halor kane ka kam ha ki snem bala leit. Kane ka dei ka jingdawa kala la rim, ym pat ju don ki Sorkar kiba la leit noh, kiban rai ban pynbeit ia kane ka kam, hynrei ka Sorkar ba ialam ka NPP bad ka Executive Committee ka GHADC ba ialam ka NPP kala rai ban pynkylla ia ka ain ban weng noh ia ki bar jylla na ka jingiakhun ia ka elekshon ka Autonomous Council.
“Ha man ki kam ba ka Sorkar ka leh, ki paidbah ki dei kiba don hakhmat eh” ula pynsngew. Ula pyntip balah dep ban thung ia ka “Delimitation Committee bad la shim ruh ia ki lad ki lynti ban pynkhreh la ka jong ka electoral roll naka bynta ka GHADC.
Haba pynpaw ba ia ka Sorkar la ialam da ki buit treikam jong u Nongialam barim (L) Purno Agitok Sangma, u Myntri Rangbah ula ong “Ngi jied ban trei na ka bynta u paidbah ha ka jaka ban ieng pyrshah ia ki liang pyrshah jong ngi, kiba ju kam burom ia ki kam ba ngi trei ma ngi”.
“Ki paidbah ki iohi ia kaei kaba ngi leh. Kila leh mynleh bad ki drama ban khring ia ki briew ha ki social media, hynrei ia ki kam ba shisha bad ki jingpyrshang jong ka Sorkar yn sa rai bad bishar da ki paidbah ka Jylla. Ka jingkut jingmut jong ngi ka iai long kumjuh sha ki briew jong ngi, kiba la ai ka jingshaniah ha ngi”.
Ula kren ruh halor ki jingkylla kiba la wanrah da ki prokram sengkam sengjam ka Jylla kiba thmu ban pynkupbor ia ki samla bad plie ia ka lad iohkam iohjam hala ka thain kum ka Promotion and Incubation of Market-driven Enterprises, Ka ai ia ki jinghikai ba bniah bha, ki nongpyni lynti (mentorship), bad ka jingkyrshan ban pynkylla ia ki buit treikam ba thymmai sha ka jingseng ia ki kam kiba lah ban iaid.
CM-Elevate, Ka tyrwa ia ka subsidy pisa (haduh 75%) ba ka jingkyrshan ram ha ka kam jngohkai, ka rep ka riang bad ki service sector ban iarap ia ki samla ba kin trei iala ki jong ki kam.
