Shillong, Jymmang 18: Ka Nongkseh SSCC joit ka la lah ba kan kiew sha ka kyrdan kaba halor duh ka Group A bad kane ka la wan hadien ba ka la lah ba kan pynliem noh ia ka Shillong Lajong FC da 2-0 ha ka jingiakhun ia ka quarterfinal league ka 5th Meghalaya State League ka Meghalaya Football Association, ba la long hynne ka janmiet ha madan ka SSA Stadium, First Ground, Polo.
Ia ki kol ba kordor tam ka kynhun ialehkai ka Nongkseh SSCC la thep ia ki da u Sheen Sohktung (67’) bad u Mebankhraw Wahlang (69’).
Hynre shwa ia kane ka jingiakhun, ka Mawlai SC ka la lah ba kan khur ia ka nam jop ba nyngkong ka jong ka ha kane ka kyrdan iakhun hadien ba ka la lah ba kan pynliem noh ia ka Rangdajied United Fc da 2-1.
Haba phai biang sha ka jingiakhun hapdeng ka Nongkseh bad ka Lajong, la wan ban sakhi da u paid nongkyrshan, katba hapdeng ka madan pat ka long ba ki ar kynhun ki sngap bad khmih thuh shwa ba kin sdang ban kham pyllait ia la ki ktang lyer ka jong ki ban nion shakhmat ia la ka rukom ialehkai.
Ha ka jingwan ban bteng pat ia ka kylla miet, ka sur ialehkai ka Nongkseh ka la sdang ba kan kylla, ha kaba ki la sdang ban kham nion bha ka rukom ialehkai ka jong ki, kaba hangne ka pynlong syndon ia u Sheen bad Mebankhraw ba tang hapdeng ki khyndiat minit ba kin ioh ba kin thep ia kitei ki kol ba kordor tam naka bynta ka kyhhun, bad kaba khlem lah ban khlem da ia risa ia kynhoi na ki paid nongwan kyrshan jong ka Nongkseh.
Kumta ha kaba kut ka jingiakhun, ka Nongkseh kan khur mynta 7 point na ki lai sien ialehkai ba ka la dep, katba ka Lajong ka don ha ka kyrdan kaba ar hadien ba ka la ioh ba kan khur 6 point bad kane ka namrem ka khanglad noh syndon hi tden ia ki 9 tylli kinam jop ki jong ka.
Ka khubor na ka jingiakhun kaba la long ha ka por mynsngi, ki kol lyngba u Basuklang Bina (39′) bad Kevin Rymbai (61′) ki long ki rang ialehkai ba la thep ia ki kol na bynta ka Mawlai SC, katba ia ka shi kol ka Rangdajied United FC ka la wan haka dur ka penalty ba la shut ia ka da u Mebannangkiew Thabah (45’+1).
Ha ka kylla miet pat, kane ka jingiakhun ka la jam shakhmat hapdeng ka jingwan ban ther u lapbah, kaba la buh jingeh bha ia ki rang ialehkai jong ki ar kynhun ban lah ban ialehkai kumba kidei ban long, hynrei, ka kynhun ialehkai jong ka Mawlai kaba kham bun kidei kiba la kham san kham rangbah ka jingim ialehkai, ki la pyndonkam hok pat ia kum kane ka jait madan ban ialehkai tad haduh ba kin da lah ba kin khur ia kane ka nam jop.
Da kane ka nam jop, ka Mawlai ka la lah ba kan khur 4 point na ki lai sien ialehkai ba ka la dep katba ka Rangdajied kam pat lah ban ioh khur point, kaba la wan ba ha ki lai sien iakhun ba la dep, kum ka kynhun ka la mad shisha ia ki namrem kiba salit bha, hynrei ka lynti iaid pat ia ka ban jam sha ka semifinal lah pat ban ong ba ka la sdang ba kan kham jngai noh.
Lashai ka sngi ka jingiakhun ka Group B ka long ba ka Nangkiew Irat FC kan iakhun pyrshah ia ka Langsning FC kaban long ha ka por 2 baje nohphai sngi bad ha ka por 6:00 baje janmiet ka Maram FC kan iakhun pyrshah ia ka Rymbai Shkenshynriah SC.
