Shillong, Jymmang 19: U President ka BJP jong ka jylla Meghalaya, u Rikman G Momin u la ialam ia ka kynhun jong ka Federation of Licensed Exporters of Meghalaya (FeLEMA) ban kyrpad ia u myntri ka sorkar pdeng jong ka Commerce bad Industries, u Piyush Goyal.
Ha kane ka jingiakynduh kila ia ka jingiakren bad phylliew jingmut bad u myntri ka sorkar pdeng halor ki mat bapher bapher ban kyntiew ia ka khaii pateng hapdeng ka India bad Bangladesh lyngba ka jylla Meghalaya.
Katei ka kynhun kala kyrpad ia ka sorkar pdeng ba kan iarap ha ka jingpynjem ia ki jingeh kiba iadei bad ka jingshalan mar shabar ri kiba la mih ha ka jylla ha kum kine ki por.
Une u myntri ka sorkar pdeng u la kular ba un sa khmih halor kane ka mat bad pyn thikna ba yn sa don ka jingsuk ha ka khaii pateng bad yn nym don kano kano ka jing thut khnang ba yn nym don ka jingduhnong na ka bynta ka imlang ka sahlang ki nongkhaii jong ka jylla Meghalaya.
Ki nongshalan mar shabar ri kila pynsngew ka jingbymdon ki jaka rung bad mih kiba biang bad ka jingkhang kynsan ia ki border haats ki iew khappud ka pynjynjar shuh shuh ia kane ka jingeh.
Ka jingsahdien ha ka jingpyniaid-kam namar ka jingbym don ka bor kaba dei peit ha ka Land Customs Station ka dei kawei pat ka daw bah kaba pynsuhniew mynsiem ne kaba pynkhuslai. Ia kine baroh, la iakren ha ka por ba don kane ka jingialang.
U Myntri u la bthah ia u Joint Secretary, Commerce bad Industries ban pynlong ia ka jingialang bad ka sorkar Meghalaya ha ka kyrdan secretary hapoh ka por kaba kloi tam ban pynbeit ia ki jingeh kiba la slem kiba iakynduh da ki nongkhaii kiba lah ban pynbiang ia ki jingbit kiba donbor bad kiba dei ain.
