Shillong, Jymmang 19: U State Level Coordinator for Oil Industry, Meghalaya-cum-Manager (LPG-Sales), Shillong Area, Indian Oil Corporation u la pynthikna ia ki paidbah ba ka jingdon jong ki mar umphniang ba kongsan, kynthup ïa ka Petrol (MS), Diesel (HSD) bad ka Liquefied Petroleum Gas (LPG), ka long kumba ju long bad khlem jingthut ha baroh ki lad pynpoi umphniang jong ki kompeni kiba pyniaid ia ka umphniang ka Indian Oil Corporation Limited (IOCL), ka Bharat Petroleum Corporation Limited (BPCL) bad ka Hindustan Petroleum Corporation Limited (HPCL) ha kylleng ka Jylla. Ka jinglong jingman jong ka jingpynbiang baroh ka dang iai bteng ban long kaba skhem bad kaba biang.
Ki kompeni die umphniang ki la pyntip ba ka jingpynpoi umphniang baroh, naduh ki terminal bad ki jaka buh umphniang haduh ki jaka die umphniang, ki treikam bha bad khlem kano kano ka jingthut. La buddien man ka por ia ka jingdon ka umphniang bad ki kam pyndap umphniang ki iaid beit iaid ryntih ha baroh ki jaka ha ka Jylla.
La ong shuh shuh ba ka jingpynpoi LPG sha ki nongpyndonkam hapoh ka ri ka long kaba la buh hakhmat eh bad ka dang ïai bteng ban long kumba ju long ha kylleng ka jylla Meghalaya. La buddien ia ka jinglong jingman ban pynthikna ia ka jingpynpoi kaba khlem jingthut sha baroh ki nongpyndonkam.
Ki kompeni die Umphniang ki dang pynneh ia ka jingiatreilang kaba jan ha kaba iadei bad ka jingpynpoi mar, ka jingpynkit ia ki mar bad ki kam die khutia ban pynthikna ia ka jingdon jong ka umphniang khlem jingeh ha kylleng ka thain. La kyrpad ia ki paidbah ba kin long kiba sngewskhem bad ban bteng ia ka rukom pyndonkam kumba ju long.
Haba pynthikna ia ki nongshong shnong, ki kompeni die umphniang ki la ong ba kam don ka daw ban sngewkhia bad la kyrpad ia ki nongpyndonkam ban kiar na ka jingthied kyrkieh.
La bthah ruh ia ki paidbah ba kin shaniah tang ha ki jingpyntip ba thikna na ki Kompeni die umphniang na ka bynta ki jingtip kiba thikna bad kiba la pynshisha ha kaba iadei bad ka jingdon ka umphniang.
