Shillong, Jymmang 19 : Mynta ka sngi u Myntri Rangbah ka jylla, u Conrad K Sangma, u la plie ia ka shnat treikam kaba 41 jong ka National Cadets Corp ha Cherangre, Tura ha ka jingdon lang ki ophisar na ka NCC.
Haba kren ha kane ka jingplie ia ka shnat treikam ka NCC, u Myntri Rangbah ka jylla u la pyn kynmaw ba ka jingthmu jong ka NCC ka long ban wanrah ha u ne ka briew ban long kiba iaid beit iaid ryntih, ba kin long kum ki nongialam, bad ba kin don ia ka mynsiem ban ieid ia la ka jong ka ri bad ban don ia ka jinglong kabab ha kum ki samla.
U Myntri Rangbah u la ong ba ka jinglah ban buh ia ka NCC batallion ka la pyn urlong ia ka jingphohsniew kaba u angbud ban don kum kane ka shnat treikam ha Garo Hill.
Ha kane ka jingialang, u la iathuh ba kumno ka jingmut jingpyrkhat ka la rung ha u ban long u shipai bad u la don ruh ka jingthmu ban rung kam pulit ban poi ha ka kyrdan ophisar, kane ka dei namar ba ki don ia ka jingpyniaid beit iaid ryntih jong ki shynrang bad kynthei kiba phong ia ka uniphom.
U Myntri Rangbah u la ong ba kitei ki lai tylli ki jinghikai kiba ka NCC ka don ka la wanrah ia ka sain dur ha ki khun samla ba kin long ki nongshong shnong kiba don ia ka jingkit khlieh kum ki nongialam ha ki sngi kiban sa wan. Ka mynsiem ieid ri bad ka jingtrei shitom ka pynlong ia ki khun samla ba kin long ki nongshong shnong kiba don ia ka jingkit khlieh.
Haba phai sha ki kam pynroi, u Myntri Rangbah u la kren shai ba kam dei eh katno klur la bei tyngka ban tei ia ki jingshna kum ki iing ki sem ki lynti ki syngkien, hynrei ka jingbei pisa ba kongsan eh ka long katno ngut la lah ban pynkylla ia ka jingim jing ki briew lyngba ki jingtei ki jingshna kliba ka sorkar ka pynlut.
U Myntri Rangbah u la ong ba 75 percent ki nongshong shnong ki long hapoh 35 snem, ka rta bad 50 percent ki dei ki samla kiba hapoh ka 20 snem ka rta dei na kane ka daw ba ka sorkar ka phai khmat ba kumno ban btin lynti ia ki khun samla bad kane ka jingplie ia ka shnat treikam ba 41 jong ka NCC ka dei kawei na kita.
Ia ka 41 Meghalaya Batallion NCC, la sei na ka 15 Assam Artillery Battery NCC ha ka 3 tarik, Jylliew 1961 bad ia kane, hadien la kyntiew kyrdan ia ka sha ka 41 Batallion NCC ha u bnai Risaw 2020 bad kane ka batallion mynta ka shim ia ka jingkit khlieh ban ai jinghikai haba iadei bad ka kam NCC ha baroh ki distrik ha Garo Hill.
