Shillong,Jymmang 19: Ka Langsning FC ka la lah ban pynliem ia ka Nangkiew Irat FC da 6-1, ha ka jingiakhun ka quaterfinal league ka 5th Meghalaya State League ba la pyniaid ia ka da ka Meghalaya Football Association, kaba long artad ka jingjop kaba 10 sien lynter ka jong ka, ha ka jingiakhun ba la long ha SSA Stadium, Polo.
Katba ha ka jingiakhun kaba ar ka Rymbai Shkenshynriah SC ka la lah ba kan pynliem noh ia ka Maram FC da 4-2.
Haba phai biang sha ka jingiakhun ba nyngkong jong ka sngi, u namtam naka bynta ka kynhun ialehkai ka Langsning FC u dei u Nelson Rymbai (69′, 73′, 87’P) uba la ioh ban thep haduh lai tylli ki kol ia kaba la bynrap lang shuh shuh da ki kol ba la thep da u Samuel Phawa (18′, 21′) bad u Morningstar Khongkiang (58′).
Katba ia ka shi kol naka bynta ka Nangkiew Irat FC ban lait brut na kane ka jingiakhun la thep ia ka lyngba ka freekick ba la shut ia ka da u Ronaldkydon L Nonglait (27′).
Naka liang u Nelson kine ki lai kol kiba u la ioh ban thep mynta ka sngi ka pynlong ia u ba un ioh ban thep haduh 21 tylli ki kol ha kane ka lympung iakhun, ha kaba ym don ruh kawei ka jingiakhun jong ka Langsning FC ba un ioh ba un thep ia ki kol ha kane ka kynti.
Ha ka jingaikhun kaba ar jong ka sngi, ia ki saw tylli ki kol ka Rymbai Shkenshynriah SC dei kiba la ioh ban thep ia ki da u Hesmiki Rymbai (28′), Monush Lapang (31′), Skilful Tariang (61′) bad Niphonghi Sumer (78′), katba ia ki ar kol ka Maram FC la thep ia ki da u Santosh Teron (50′) bad Jakchim K Marak (88′)
Hadien kine ki jingiakhun haba ia phai sha ka miej iakhein point ka Langsning FC mynta ka la ioh ba kan khur 9 point bud pat sa ka Shkenshynriah kaba don ha ka kyrdan kba ar hadien ba ka la ioh ba kan khur 6 point, ka Nangkiew Irat ka don haka kyrdan kaba lai hadien ba ka la khur 3 point bad ka Maram FC kam pat shim la lah ban ioh khur satia ia ka point (0).
Lashai ka sngi ka jingiakhun kan dei naka bynta ka Group A kaba dei artad ka jingsdang naka bynta ka kylla kaba ar (second leg), ka jingiakhun ba nyngkong kan long hapdeng ka Mawlai SC pyrshah ia ka Rangdajied United FC ban long ha ka por 2 baje nohphai sngi, ban bud pat da ka jingiakhun ka Nongkseh SSCC pyrshah ia ka Shillong Lajong FC kaban long haka por 6 baje janmiet.
Kumban shu pynkynmaw ba kine ki saw kynhun ki dang shu dep ban iakhun hynnin ka sngi ha kaba ka Mawlai ka la jop da 2-1 ia ka Rangdajied United F C, katba ka Nongkseh SSCC ka la pynliem da 2-0 ia ka Shillong Lajong FC.
