Shillong, Jymmang 20: Wat hapdeng ki jingbym thikna ba don ha ka pyrthei baroh kawei kiba ktah ïa ka kam umphniang bad Gas, ki kompeni kiba pyniaid ia ka umphniang – ka IndianOil, BPCL bad HPCL – ki dang ïai bteng ban pynthikna ïa ka jingdon jong ka Petrol (MS), ka diesel (HSD) bad ka Liquefied Petroleum Gas (LPG) khlem jingthut ha kylleng ka jylla Meghalaya.
Ki kompeni die umphniang ki long kiba la pynkhreh pura ban pynneh ïa ka jingpynbiang umphniang khlem jingeh lyngba ki rynsan kiba iar jong ki terminal, ki jaka buh umphniang, ki jaka pyndap LPG bad ki jaka die khutia ha kylleng ka Jylla.
Ki kam sam umphniang ki dang iaid beit iaid ryntih ha baroh ki jaka die khutia, ha kaba la pynneh ia ki jingpynbiang katkum ki kyndon ba la buh jong ka jingshngain bad ka jingtreikam.
Ka jingdon jong ki mar ba shna da ka umphniang bad ka jingpynbiang ia ki kadei kaba la leh man ka por ban pyndap ia ki jingdonkam jong ki briew. Ka jingsam LPG sha ki briew hapoh ka ri ruh ka iaid beit iaid ryntih ha baroh kawei ka jylla Meghalaya.
Ki Kompeni kiba pyniaid ia ka umphniang ki iatreilang ha kaba iadei bad ka jingpynpoi mar, ka jingbuh ia ki mar bad ka jingthmu ban sam khnang ban pynthikna ia ka jinglah ban ioh bording khlem jingthut na ka bynta ki nongshong shnong. Ka jinglong jingman jong ka jingpynbiang baroh kalong kaba skhem bad hapoh ka jingpeit bniah kaba man ka por.
La kyntu ia ki nongshong shnong ban bteng ia ka rukom thied kumba ju long man ka por bad ban kiar na ka jingthied kyrkieh khlem da donkam.
La kyrpad ruh ia ki paidbah ba kin shaniah tang ha ki jingpyntip ba la pynmih da ki Kompeni Die Umphniang na ka bynta ki jingtip kiba la pynshisha bad kiba shisha kiba iadei bad ka jingdon jong ka umphniang.
