Ampati, Jylliew 26: Na ka ophis treikam jong ka District Election Officer, South West Garo Hills, kala pynbna ba iaka Election Commission of India (ECI), ha ka jingpyn treikam iaka bor jong ka hapoh ka Article 324 jong ka Riti synshar ka Ri India bad ka Section 21 jong ka Representation of the People Act, 1950, kala hukum iaka jingpyniaid ka Special Intensive Revision (SIR) iaka jingthep vote ha ka jylla Meghalaya.
Ka jingpynkylla thymmai ka thmu ban pynthikna iaka jingbeit bad ka jingjanai jong ki kyrteng thep vote da kaba kynthup ia baroh ki nongshong shnong kiba biang ka hok ban thep vote bad pyndam noh ia kiba ym dei shuh ne bym biang ka hok.
Katba iaka tarik ba la buh na ka bynta ka jingpyrshang ka long ha ka 1 tarik Risaw 2026. Yn sa don ruh ka jingleit pyn tikna na ka iing sha ka iing da ki Booth Level Officers (BLO) naduh ka 30 tarik Jymmang haduh 29 tarik Jylliew 2026, ha kaba man ki nongthep vote kin ioh iaka phorm pynrung kyrteng lane ka Enumeration Form.
La ong ba ki nongthep vote ki hap pyndep ban thep iaki kyrteng jong ki ha kane ka phorm bad pynphai iaka kopi sha ki BLO. Lah ban pyndap iaki kyrteng ha ka Enumeration Form da kaba leit online ha ka por ba khmih bniah.
Katba iaka draft electoral roll, yn sa pynmih ha ka 5 tarik Nailar, 2026, kaba bud pat da ka por na ka bynta ban ujor bad kyrpad ban thoh iaka kyrteng kito ki bym pat don kyrteng ha ka phorm pynrung kyrteng naduh ka 5 tarik Nailar haduh 4 tarik Nailur 2026. Hadien katei, iaka por ba khatduh jong ka jingpyn rung kyrteng, yn sa pynmih ha ka 7 tarik Risaw 2026.
Ban pynsuk iaka rukom pynkylla, iaki kyrteng jong ki nongthep vote kaba la dep pyntreikam da ka Special Intensive Revision ha u 2005, la dep pyni have ka website jong ka South West Garo Hills distrik.
La pyn kynmaw ba iaki nongthep vote ba la dep jied ban thep vote, ki dei ban pyn thikna bad kynmaw iaki jingtip jong ki, kynthup iaka Assembly Constituency, Part Number bad Serial Number, naduh ka kyrteng jong ki nongjied ha u snem 2005.
Kito ki bym pat paw ka kyrteng jong ki ha u snem 2005 ka jingjied iaki kyrteng hynrei ka kynthup iaka kyrteng kmie bad kpa, dei ban ai jingtip shaphang jong ki kmie ki kpa ha ka Enumeration Form. Ym shah kino kino ki kot bym dei ban buh lang bad kane ka phorm.
Ka Election Commission kala pynbeit pynbiang iaki jaka thep vote da kaba pynduna iaki nongjied ban shah thep vote ha man ki jaka naduh 1,500 haduh 1,200, lem bad ka jingthmu ban pynbiang iaka rukom thep vote ha ka por elekshon.
Ka District Election Officer kala pynbna ba yn sa don ki jingialang ba man ka por bad ki party sain pyrthei ba la ithuh na ka bynta ban pyn thikna iaka jingiatreilang jong ki ha ka jingpyn treikam kaba jop jong ka Special Intensive Revision.
Yn sa pyn beit ia kine ki jingialang ha ka taiew ban wan na ka bynta ban batai shaphang ki party sain pyrthei halor ka jingiaid beit iaid ryntih ka kam da ka jingleh hok bad ki kyndon.
Ka District Election Officer ka la kyrpad iaki nongthep vote ba kin iabud iaki kyndon ryngkat bad ki Booth Level Officers ha ka por ba don ka jingleit pyn rung kyrteng ha man ki iing briew bad ban iashim bynta ha kiwei pat ki liang khnang ban nym don kano kano ka jingthut bad ban iaid beit ka kam.
