Shillong, Jylliew 26: U Myntri Rangbah ka jylla Meghalaya, u Conrad K Sangma mynta ka sngi u la leit ha ka jingialang jong ka International Conference on Women Farmers and Sustainable Organic Agriculture kaba la long ha State Convention Hall, Shillong.
Ia katei ka jingialang kaba la pyniaid da ka tnad Agriculture bad Farmers’ Welfare, sorkar Meghalaya, ha ka jingiatreilang bad ka IFOAM – Organics Asia, kane ka jingialang kala don ki nongiashim bynta na ki riew paw khmat na ri India bad shabar ka Ri India, kynthup iaki nongmihkhmat na ka kynhun ba la tip kum ka KfW bad IFOAM, ryngkat ki nongthaw polisi, riew shemphang bad ki nongioh jingmyntoi kiba dei na ka rep tynrai khlem dawai.
Haba kren shaphang kane ka jingialang, u Myntri Rangbah, u Conrad K. Sangma, u la ban jur ba ka jingtrei shitom ka sorkar ban kyntiew bad pynlong nyngkong ia ki nongrep halor bad ki rukom rep kiba neh.
U la pynpaw ba ha kine ki phra snem kiba la dep, ka sorkar jylla ka la trei shitom na ka bynta ban pynkhlain iaka rep ka riang, da kaba buh iaki nongrep, khamtam eh iaki kynthei, hapdeng ka thong ka jingroi jingpar jong ka.
U Conrad u la ong ruh ba ka long ka kabu ksiar na ka bynta ki kynthei kiba ioh iaka bhah ne ka bynta jong ki iaki jaka bad jaka rep namar ba la ioh bynta da ka kynthei ha kane ka ai jait kmie ha ka jylla Meghalaya bad u la ong ba kane ka pynlong iaki ba kin long trai hi iaka jaka bad sumar iaka jaka rep bad kit khia iaka kam, ha kaba ki lah ban rep ban riang ruh.
U la ong ruh ba ki nuksa ki lah ban long ki nongmuna ba kordor na ka bynta ka ain rep jong ka pyrthei, khamtam ha kaban sngewthuh iaka jingiadei hapdeng ka jinglong trai iaka jaka, jingmih bad jingpyn neh pyn sah iaka khyndew.
U Conrad u la kren shaphang ka jingdonkam jong ki Khasi ha kaban pyn neh pyn sah iaka sap rep ka riang naba ki Khasi ki im bad ka mariang bad ka mariang ka im bad ki bad ka riti ka dustur, khamtam ha ka jylla shatei lam mihngi, kaba la lah ban neh sah ka kolshor hyndai na ka bynta ki pateng ban wan.
U la pynpaw shai ba ka jingia snoh kti ka long kaba donkam, kynthup iaka jingiadei lane jingtreilang kaba janai bad ka sorkar ne ki karkhana treikam shimet khlem da pynduh myntoi ia kiwei.
Katba u Myntri ka tnad Agriculture & Farmers’ Welfare, u Timothy D. Shira, lem bad kiwei ki riew paw khmat kila pdiang sngewbha iaki nongiashim bynta bad ong ba ka sorkar ka pynthymmai biang iaka jingkular ban pynkiew shakhmat iaka rep mariang bad ban kyntiew iaki kynti nongrep.
