Shillong, Jylliew 15: U Myntri ka Sorkar Pdeng ba dei peit ia ka Tnad Road Transport and Highways u Nitin Gadkari mynta ka sngi u la buh maw nongrim bad aiti sha ka ri ia hynriew tylli ki projek surok bah ha jylla Meghalaya kiba kynthup ia ka jingbei tyngka baroh kaba T.3,214 klur ha ka jingialang kaba la long ha madan Polo, Shillong.
Ha kane ka prokram la wan ban ïashim bynta da u Lamphang ka Ïing Dorbar Thaw Aiñ jong ka Jylla Meghalaya u Thomas A Sangma, u Myntri Rangbah ka Jylla u Conrad K. Sangma, ki Symbud Myntri Rangbah ka jylla u Bah Prestone Tynsong bad u Bah Sniawbhalang Dhar, u Dkhot ka iing dorbar thawain Parliament u Saleng A. Sangma, ki Myntri ka Jylla, ki dkhot jong ka iing dorbar thawain ain jong ka jylla bad ki heh sorkar.
Haba ai jingkren ha ka jingialang, u Gadkari u la ong ba ka Meghalaya, kaba la ioh ka jingkyrkhu kyrhai jong ka jingitynnad ka mariang, ka jingiar jong ka kolshor bad ka lad ba ka don ha ka ioh ka kot, ka donkam ia ki jingdon jingem kiba khlain ha kaba iadei bad ki surok ban plie ia ki lad ba thymmai na ka bynta ka roi ka par, ka kam jngohkai pyrthei, ka khaii pateng bad ka ioh kam ioh jam.
U la ong ba hapoh ka jingialam jong u Myntri Rangbahduh ka ri u Narendra Modi, ka jylla Meghalaya ka sakhi ia ka jingkylla kaba ym pat ju jia mynno mynno ruh ha ka jingpyniasoh ia ki surok.
“Ki projek surok bah jong ka ri kiba shongdor kumba T.52,400 klur dang pyntreikam mynta ha ka Jylla. Ki projek kiba kynthup kumba 820 kilomitar kidei kiba la pyndep, ka jingshna ka dang iaid shaphang ha jan 310 kilomitar, katba ki projek kiba kynthup kumba 450 kilomitar ki dang don ha ki kyrdan bapher bapher jong ka jingpynkhreh bad jingpyntreikam,” u la ong.
Katto katne ki projek ba kongsan ba la pyndep ha kine ki snem ba la dep ki la kyntiew shibun ia ka jingpyniasoh ha kylleng ka jylla Meghalaya. Ka Shillong–Nongstoin–Tura Trans Meghalaya Highway ka la pynduna ia ka por leit por wan hapdeng ka nongbah Shillong bad Tura na jan 12 kynta sha ka 6 kynta eiei.
Ka Jorabat–Umiam Four-Lane Road, Tura–Dalu Road, Jowai–Malidor Road bad Ranikor–Baghmara Road ki la pynkhlaiñ ïa ka jingpynïasoh ha kylleng ka Jylla bad pynsuk ïa ka jingïoh rung sha ki thain khappud.
Kum shi bynta jong ki sienjam kiba dang ïaid shakhmat, hynriew tylli ki projek surok bah kiba kynthup ïa palat 117 kilomitar bad ka jinglut kalong palat T.3,214 klur la plie paidbah mynta ka sngi.
Napdeng ki projek ba la aiti sha ka ri, ka Package-I jong ka Project Shillong–Dawki Road la lah ban pyndep ha ka jingjngai kaba kumba 11 kilomitar ha ka jinglut kaba T.351 klur.
Kane ka projek kan kyntiew ia ka jingpyniasoh hapdeng ka Shillong, Dawki bad ka thain khappud India–Bangladesh katba kan pynkhlain ia ka kam jngohkai pyrthei, ka khaii pateng bad ka kam ba iadei bad ka ioh ka kot ha ka thain.
Ka Jowai Bypass Project, kaba la pyndep ha ka jinglut kaba T.106 klur ha ka jingjngai kaba jan 5 kilomitar, ka la pynduna ia ka jingkhapngiah ha ka sor Jowai bad ka la kyntiew shibun ia ka jingshngain ha surok bad ka leit ka wan.
La buh ia ki maw nongrim na ka bynta saw tylli ki projek surok bah ba kongsan. Ka Tura Bypass Project ha NH-127B bad NH-217 yn tei ha kumba 29 Kilometer ha ka jinglut kaba T.952 klur. Kane ka projek kan pyniaid lait ia ki kali na ki jaka ba bun briew jong ka Tura, kan pynduna ïa ka jingkhapngiah bad kan pynsuk ïa ka leit ka wan kaba kham stet bad kaba kham shngain sha ka thain khappud kaba don hajan Dalu.
Ka jingkieng Durgiri-Phulbari sha Selsella-Simbukolgre (Package-I) ka bynta ha ka NH-127B yn shna ha ka jingjngai kaba kumba 32 kilomitar ha ka jinglut kaba T.737 klur. Ka jingpyniasoh bad ka jingkieng Dhubri–Phulbari kaba yn dang shna halor ka wah Brahmaputra, kane ka projek kan pynkhlain ia ka jingpyniasoh ha ka thain West Garo Hills bad kan kyntiew ia ka jingsuk ban leit sha ki jylla ba marjan.
Ia ka Pynursla Bypass Project ha ka surok bah NH-206 yn shna ha ka jingjngai kumba 8 kilometre ha ka jinglut kaba T.564 klur. Kane ka surok bypass kan pynduna ka jingkhapngiah ha sor Pynursla, kan kyntiew ia ka leit ka wan bad kan pynkhlain ia ka jingpyniasoh sha Dawki, wah Umngot bad ka thain khappud, da kaba kyrshan ia ka kam jngohkai pyrthei bad ka khaii pateng sha shiliang pud.
Kumjuh ruh ïa ka Package-II na Selsella–Simbukolgre sha Koiragre yn shna ha ka jingjngai kaba kumba 32 kilomitar ha ka jinglut kaba T.504 klur. Ka projek kan kyntiew shuh shuh ia ka jingpyniasoh ha kylleng ka West Garo Hills, kan pynsuk ia ka jingkit ia ki mar bad kan kyrshan ia ka jingkiew ka ioh ka kot ha ka thain.
U Gadkari u la ong ba ka Shillong–Dawki Corridor, kaba dang shna mynta, kan kyntiew shibun ia ka jingpyniasoh bad ka Bangladesh lyngba ka thain khappud Tamabil, kan pynduna ka jingkhapngiah ha Upper Shillong, kan pynduna ia ka por leit por wan bad kan pynkhlain ia ki jingiadei ha ka liang ka rukom treikam bad ka ioh ka kot.
U la ong ba kine ki projek kin ai ka jingkyrshan kaba khraw ia ka khaii pateng bad ka kam jngohkai pyrthei ha Dawki, Dalu bad Sohra, ha kajuh ka por kan pynmih shibun ki lad ioh kam bad ki ki lad seng kam seng jam.
U la ong shuh shuh ba ka jingpyniasoh kaba bha kan kyntiew ïa ka jingïoh ïa ki lad jingsumar bad ki jingshakri ba kyrkieh ha ki jaka ba jngai lyngba ki jingpyniasoh kiba kham bha sha ka nongbah Shillong bad Guwahati. La khmih lynti ruh ba ki projek kin pynkhlain ia ki jingkyntiew kam ha ka rep ka riang bad kyntiew ia ki lad kamai kajih tynrai, kynthup ia ki kam ba iadei bad ki siej, ka jingthain jain Eri silk (Ryndia) bad ka jingshna khiew.
U Gadkari u la ban biang ia ka jingangnud jong ka Sorkar ban pynbiang ia ki jingdon jingem ba iadei bad ki surok bah kiba katkum ka juk mynta ha kylleng ka jylla Meghalaya bad ka thain shatei lammihngi baroh kawei ban pynthikna ia ka leit ka wan kaba kham stet, kaba suk bad kaba shngain.
Hashuwa kane, u Gadkari u la ïashim bynta ha ka jingïalang plie pyrda ia ka North East India Infrastructure Summit and Exhibition (NEIINFRA 2026) ha Lariti Performing Arts Centre, Shillong. Kane ka jingialang kaba ar sngi ka la wanrah lang ia ki nongthaw polisi, ki nongialam karkhana, ki nongbei tyngka, ki nongkyntiew ia ki jingdon jingem bad ki nongmihkhmat jong ka sorkar ban iamir jingmut halor ki lad ki lynti bad ki jingeh kiba iadei bad ka jingkyntiew ia ki jingdon jingem, ka jingpynpoi mar, ka kam jngohkai pyrthei, ka jingpyniasoh digital, ka jingkiew jong ki karkhana bad ka jingbei tyngka ha ka thain shatei lammihngi. Kane ka jingïalang ka la long kum ka rynsan ban kyntiew ïa ka jingïatreilang hapdeng ki sorkar bad kito kiba don bynta ha ka kam karkhana ban pynsted ïa ka jingkyntiew ia ki jingdon jingem kiba lah ban iaineh bad plie ia ka lad jong ka thain kiba iadei bad ka ïoh ka kot.
Haba ai jingkren ha ka jingïalang, u Gadkari u la pynbna ïa ki projek surok bah ki ban sa wan kiba shongdor haduh T.39,800 klur kiba kynthup kumba 450 kilomitar ha kylleng ka Jylla Meghalaya, kiba la khmih lynti ba kin pynkylla ïa ki lad ka leit ka wan jong ka Jylla bad pynsted ïa ka jingkiew ha ka ioh ka kot.
Ka 4-Lane Greenfield Shillong–Silchar Corridor, kaba la antad ba ka jinglut kan long T.23,000 klur, yn shna ha ka jingjngai kaba kumba 165 kilomitar bad la khmih lynti ba kan paw kum kawei na ki projek ba kongsan tam ba iadei bad ki jingdon jingem ha ka thain shatei lammihngi. Kane ka surok kan pynduna ia ka por leit jingleit hapdeng ka nongbah Shillong bad Silchar da kumba 50 persent bad kan ai ka lad ka leit ka wan kaba kham stet sha Tripura, Mizoram bad Manipur lyngba ka Silchar.
Da kaba pyniasoh ia ki jaka ba kongsan ha ka ioh ka kot, ki jaka jngohkai pyrthei bad ki jaka pynpoi mar, la khmih lynti ba kane ka projek kan kyntiew ia ka jingroi jong ki karkhana, ka khaii pateng, ka kam jngohkai pyrthei bad ka jingbei tyngka ha kylleng ka thain.
Ka jingthmu ban shna 4-Lane Greenfield Jorabat–Barapani Corridor, kaba la antad ha ka jinglut kaba T.8,500 klur bad kaba jrong kumba 66 kilomitar, kan ai ka jingpyniasoh kaba sted hapdeng ka Guwahati bad ka nongbah Shillong.
La khmih lynti ba kane ka projek kan pynduna ia ka por leit jingleit hapdeng kine ki ar tylli ki nongbah na kumba 2.5 kynta sha jan shi kynta bad kan long shi bynta jong ka Siliguri–Guwahati–Shillong–Silchar Economic Corridor ka ban wan.
U Gadkari u la ban jur ruh halor ka jingkongsan jong ka bynta Darugiri–Baghmara–Dalu jong ka NH-217 ba la thmu ban shna, ha ka jinglut kaba la antad T. 4,000 klur ha ka jingjngai kaba kumba 136 kilomitar. Ka projek kan kyntiew shibun ia ka jingpyniasoh ha ka thain Garo Hills bad ki jaka khappud kiba iajan bad ka Bangladesh, kaba ai lad kaba kham bha ban ioh ia ki iew ki hat, ka koit ka khiah, ka pule puthi bad ki lad kamai na ka bynta ki nongshong shnong jong ka thain.
Shuh shuh u la ong ba ki projek kum ka bynta jong ka Pomlum–Umtyngar jong ka Shillong–Dawki Corridor, ka jingkyntiew ïa ka surok Tura–Dalu, ka Tura Bypass Project, ka Pynursla Bypass Project bad ki projek ban pyniasoh ia ka NH-127B bad ka jingkieng Dhubri–Phulbari kan nang pynkhlain shuh shuh ia ki jingdon jingem jong ka Meghalaya ha kaba iadei bad ka leit ka wan bad ka jingkyntiew ia ki lad jingpyniasoh sha baroh ki jaka.
Ha ka jingialang plie pyrda ia ka NEIINFRA 2026 la wan ban ïashim bynta da u Myntri Rangbah ka Jylla Meghalaya u Conrad K. Sangma, u Myntri Rangbah ka Jylla Nagaland u Dr. Dr. Neiphiu Rio, u Symbud Myntri rangbah ka jylla Nagaland u T. R. Zeliang, ki symbud Myntri Rangbah Bah Prestone Tynsong bad bah Sniawbhalang Dhar, ki heh ophisar na ka sorkar pdeng bad ki sorkar jylla, ki nongmihkhmat na ki karkhana bad ki nongmihkhmat na kylleng ka ri.
U Gadkari u la pynpaw ka jingsngew skhem ba ki projek ba iadei bad ki jingdon jingem kiba dang ïaid shakhmat bad kiba la tyrwa kin pynkylla ïa ki lad ka leit ka wan jong ka Meghalaya, pynsted ïa ka jingkiew ka ioh ka kot, plie ki lad ioh kam ioh jam bad kan noh synñiang sha ka jingthmu jong ka Viksit Bharat.
