Tura, Jylliew 17: Ki nongtrei jong ka North Eastern Hill University (NEHU) Tura Campus ha ka sngi ba ar kala sdang iaka jingiakhih basuk kaba la tip kum ka “Pen Down–Tool Down” kaba mut ka jingpyn sangeh iaka jingtreikam habar ka phyllaw jong kane ka skul bah, da kaba dawa da ka jingban shim khia halor ki mat ba sah jong ka kam, kynthup iaka jingsdang iaka Department of Personnel bad Training (DoPT), ka jingpeit biang iaki jingpynkiew kyrdan bad jingpyniar kyrdan, ka jingpyllait iaka tulop ba sah na ka bynta kiba la shongthait, ka jing registar iaka Employees Provident Fund (EPF) bad ka jingpynbiang iaka tulop ha ka por ba biang iaki nongtrei casual.
Katei ka jingiakhih kala pynbud da ka dorkhas ba la dep phah da ka seng ki nongtrei sha u Vice Chancellor ka NEHU ha ka 10 tarik, Jylliew 2026. Katkum katei ka seng, la ong ba ki jingai dorkhas kiba man ka por sha ki bor pyniaid university kim shym la wanrah jingpynhun satia halor ki jingeh kiba la kyntiew da ki nongtrei.
Ha kawei na ka jingrah iaki plakard, ka la thoh da kaba ong, “Sangeh ka jingleh shiliang, kyndit thiah noh ko nongpyniaid ka skul,” ha kaba kane ka pynpaw iaka jingud hapdeng ki nongtrei ha kaba iadei bad kaei kaba ki shah leh shiliang bad ka jingtreikam bym hok.
Ka seng kala ong ba la dep buh bun tylli ki mat iakren sha kiba dei peit ia kane ka skul bah, kynthup ia u Vice-Chancellor bad u Pro Vice-Chancellor jong kana ka skul bah ha Tura. Katba ki nongtrei ki la ong ba ka jing sngap mynthi na ki, kala lam sha ka jingpynlong ia kane ka jingiakhih.
Ka seng ka la ong ba kane ka jingiakhih ka long kum ban pyn kyndit iaki bor ba dei peit ba kin khmih iaki jingeh ba sah jong ki nongtrei bad kiwei kiwei. Ki nongtrei kila ong ruh kane ka jingiakhih kan bteng da ka jingsuk tad haduh ban da la shimkhia.
Katba iaki kotpi jong ka dorkhas, la dep phah sha u Pro Vice-Chancellor ka Tura Campus, u Myntri Rangbah ka jylla Meghalaya, ki heh ba dei peit ki tnad bad ki kiwei kiwei, u Vice-President jong ka Post Graduate Students’ Union (PGSU) ha Tura Campus bad ki nongialam jong ka Garo Students’ Union (GSU).
