Shillong, Jylliew 16: Ka dorbar mang tyngka jong ka Khasi Hills Autonomous District Council kaba lai sngi kala sdang mynta ka sngi 16/Jylliew/2026 ha kaba u Executive Member ba dei peit ia ka pla pisa u bah Seiborlang Warbah u la wanrah ia ka mang tyngka kaba duna pisa da T.16,92,650/- lak.
Haba kren hapoh ka iing dorbar haba wanrah ia kane ka mang tyngka u la ong ba kane ka Executive Committee kaba mynta kan ym shongthait ban wad ia ki lad ki lynti ban kyntiew ia ka ioh ka kot jong ka council ban pynbha ia ka jingtrei kam bad ban peit bniah ia ka jingpynlut ba kan long kaba adkar.
Na ka liang u EM u la iathuh hapoh ka iing dorbar ba ka jingpynlut ha une u snem mang tyngka 2026-2027 kan long T.214,60,09,410/- klur, bad la antad ba ka jingmih ha kane ka snem mang tyngka kan long T.214,43,16,760/- klur bad haba shim ia ka jingkhein hapdeng ka jingpynlut bad ka jingmih ka don ka jingduna pisa kaba T.16,92,650/- lak.
Haba kren ha kane ka mang tyngka u Executive Member la iathuh hapoh ka iing dorbar ba ka Executive Committee kala shim ia ka sien jam ban teh lakam ia ki jaka raid hadien ba la iohi ia ka jingnang duna jong ki jaka raid da ka jingai bynta ia ki khyndew raid sha ki riew shimet bad ki kompeni da ki phew phew akar bad hektar.
Kane ka buh jingma ia ki longdien mandien ba kin ioh jaka rep jaka riang ne jaka shong jaka sah ia ki khun ki hajar jong ka raid khamtam ia kiba duk kiba suk ki rangli ki juki kiba yn ym mad shuh ia ki jingiohi jngai jong ki longshuwa manshuwa kiba la buh la siang ia ki jaka raid lada shu ieh mon khlem da teh lakam ia ki jingai jaka pathar ia ki jaka raid kane kan pynlong ia kiba bun ban buhai shnong sha sor ban wad ja kpoh.
Na ka liang u EM u la pule ruh na kino ki lad ki lynti kiba ka Executive Committee kan pynmih ia ka jingioh jong ka kaba u la kdew ba ki don khatsaw tylli ki lad pynmih pisa bad la kdew ruh ia ka jingpynlut ia ka pisa sha ki khyndai tylli ki tnat trei kam hapoh ka KHADC.
