Shillong: Ka Meghalaya ka la ioh ba kan khur ia ka takma ba nyngkong na ka lympung ialehkai the 14th Senior National Pencak Silat Championship 2026, da ka jingioh ban khur ia ki artylli ki takma ksiar na ka kyrdan iakhun jong ka artistic (seni).
Ka sngi kaba ar jong ka jingiakhun ba lai sngi ka long ba ka kynhun ialehkai ka Meghalaya ka la pyrshang ruh ba kan kham paw wat ha ka kyrdan iakhun jong ka combat (tanding).
Kane ka lympung ba la long ha Sports Authority of India (SAI) centre, NEHU campus, la wan ban iashim bynta da kumba 1,500 ngut ki nongialehkai na ki 36 tylli ki jylla bad ki Sports Board ka ri kiba la mih madan ban iakhun ban ioh ban rah ia ka nam kum ki nongjop, ia kane ka lympung la pynlong ia ka da ka Indian Pencak Silat Federation (IPSF) ryngkat bad ka Meghalaya Pencak Silat Association (MPSA).
Ka kongsan ha ka sngi kaba ar jong kane ka lympung dei ka Additional Superintendent of Police ka Police Neena Rabha MPS.
Kane ka jingialehkai ka dei kaba napoh ka ri Indonesia bad kadei ruh kawei na ki jait jingialehkai ba la pynlong ha ka lympung ka Asian Games.
Haba phai biang sha ka jingiakhun ki khynnah ka jylla u Anthony Shadap ula long uwei napdeng ki nongialehkai uba la lah ban jam sha ka kyrdan iakhun ka pre-quaterfinals kaba la wan hadien ba ula lah ban pynliem noh ia u Benjamin Lalrindika ka Mizoram
Katba ka Sunita Klein kaba wat hadien ba ka la shah tam ha ka kylla ba nyngkong, hynrei ka dem khui ban iakhun tyngeh ban lah pat ban pynliem ia ka Sanooja K ka Kerela ha ka jingiakhun ki kynthei.
Ka Anisha Phangcho ka la jam sha ka pre quarters hadien ba ka khur tang shi point ha ka jingiakhun pyrshah ia ka nongialehkai ka Uttar Pradesh.
Kane ka lympung ialehkai yn pynhap pyrda noh ia ka, lashai ka sngi ha kaba u kongsan ban wan ban iadon lang un dei u bah Mayralborn Syiem, Nongpoh MLA uba bat artad kum u Chairman ka Meghalaya State Health Advisory Board.
