Shillong, Nailar 03: Kum shi bynta ka campaign Nasha Mukt Yuva for Viksit Bharat ha ka ri baroh kawei, ka MY Bharat, East Khasi Hills 
ka la pynlong ia ki jingiakop Nasha Mukt ha ka kyrdan district ha St. Edmund’s College hynnin ka sngi, ban pynshlur ia ka jingiashim bynta jong k samla ha ka jingiakhun pyrshah ia ka jingdih drok.
Kane ka jingïalang ka la pynïasohlang ïa ki samla pule bad ki samla na kylleng ka district ban pynsaphriang jingtip pyrshah ïa ka jingdih drok lyngba ka jingpyni ia ki sap bad ban pynskhem ïa ka khubor jong ka imlang sahlang kaba koit ba khiah bad kaba lait na u drok.
La pynlong phra tylli ki jingiakop kiba pynshong nongrim ha ka phang pdeng jong ka jingiada na ka jingdih drok, kaba la ailad ia ki nongiashim bynta ban pyni ia ka jingtbit jong ki lyngba ka jingsaindur, ka thoh ka tar bad kiwei kiwei ki kam. Ki jingiakop ki la sakhi ia ka jingiashim bynta shitrhem na ki samla pule bad ki samla, kaba pyni ia ka jingaiti jong ki sha ka kam ban tei ia ka imlang sahlang kaba lait na u drok.
Haba ai jingkren ha ka jingialang, u Bipul Das, DSP (Crime), East Khasi Hills, u la kyntu ia ki samla ba kin kiar na ki jingdih pynbuaid bad ban long ki nongshong shnong kiba don ka jingkitkhlieh. Da kaba ban jur ia ka jingdonkam jong ka jingiatreilang, u la pynshlur ia ki nongiashim bynta ban ialam lynti ha ka jingai jingtip bad pynkhlain ia ki sienjam ha ka imlang sahlang ban ialeh pyrshah ia ka jingma jong u drok.
Ïa kane ka prokram la pynlong da u District Youth Officer, My Bharat Shillong, Tnad Youth Affairs jong ka sorkar pdeng, ryngkat ka jingkyrshan jong ka kynhun MY Bharat kaba la trei borbah, kaba pynthikna ia ka jingpynlong kaba jop ia ki jingiakop bad ki prokram ai jinghikai paidbah.
Ka bynta kaba kyrpang jong ka kane ka prokram ka long ka jingleit jngoh jong ki nongjop ha ki district sha Raj Bhavan, Shillong, ha kaba ki la ioh lad ban iakynduh ia u Lat ka jylla Meghalaya.
Ha kane ka jingleit jngoh, ki nongiashim bynta ki la pyni ia ka street play kaba pyni ia ka jingiada na ka jingdih drok bad ka jingdonkam ban im ka jingim kaba koit ba khiah, kaba lait na ka jingkyrni. Kane ka street play ka la ioh jingiaroh na baroh namar ka jingkyntiew ia ki jingthmu jong ka campaign bad ai mynsiem ia ka jingtreilang pyrshah ia ki jingdih pynbuaid.
Ki nongjop ha ki jingiakop ha ka kyrdan district kin mihkhmat ia ka East Khasi Hills ha ki jingiakop ha ka kyrdan jong ka jylla. Ki nongjop ha ka kyrdan jong ka jylla hadien kin sa ïakhun ha ki jingïakop ha ka kyrdan jong ka ri hapoh ka campaign Nasha Mukt Yuva for Viksit Bharat.
Ki riew shemphang kiba trei ha ka kam ban iada na ka jingdih drok ki la ai ruh ïa ki jingtip shaphang ki jingma kiba lah ban mih na ka jingdih drok, ki lad jingïada bad ka jingdonkam ban shim ia ki rai ha ka jingim da ka jingsngewthuh. Ki jingïalang ki la pyni ia ka jingktah jong ka jingdih drok ia ka imlang sahlang, ka met ka phad bad ka jingmut jingpyrkhat bad ki la pyni ia ka jingdonkam jong ka jingsngewthuh na ka bynta ka jingïada.
