Shillong, Nailar 03: Ka seng samla pule ka KSU kala shimkhia ia ki jingujor na ki samla pule ka NIT Meghalaya hadein ba ka la pynbor ia ki ban soi ia ka Undertaking bad Declaration Form kaba khang ia ki ban seng ne kino kino ki Students’ Body, bad ruh ba la pynsngew ba ka jingpoi klas kam dei ban duna na ka 100%.
Ka seng kala shem ba kine ki kyndon ki long kiba khlem nongrim, kiba pynkhein ia ka jinglaitluid bad ka hok jong ki samla pule.
Ha ka jingiakynduh bad ki bor pyniaid jong ka NIT, ka KSU ka la pynrem jur ia kine ki rukom treikam bad ka la maham ba dei ban weng noh mardor ia ka Undertaking hapoh shi taiew, bad ban pynbeit ruh ia ka polisi jong ka jingpoi klas katkum ki kyndon kiba ia dei bad ka pule puthi.
Hadien san sngi, ki bor pyniaid jong ka NIT Meghalaya ki la phah ia ka jubab paidbah sha ka Seng, kaba pynshisha ba, Ka attendance ba dei ban bud ka long tang 75%, ym ka 100% kumba la kynnoh.
La pynduh noh ia ka rukom shim Undertaking bad Declaration Form naduh ka Academic Session 2026–27, bad ym shym la shim shuh na ki samla pule kiba rung naduh kane ka samoi pule.
Ka NIT ka la pyntip ruh ba kan pynkhlain ia ka Student Grievance Redressal Mechanism bad kan wanrah ia ka Online Grievance Portal ban pynsuk ia ki samla pule ban phah ia ki jingujor jong ki.
Ka KSU ka sngew ba kane ka dei ka jingjop jong baroh ki samla pule, bad ka pyni ba haba ka sur jong ki samla ka mih paidbah bad da ka nongrim kaba dei, lah ban pynkylla ia ki polisi kiba ktah ia ka jingbit jingbiang jong ki.
Ka Seng ka ai khublei ia baroh ki samla pule kiba la pynpaw ia ki jingeh jong ki bad kiba la buh ka jingshaniah ha ka KSU. Ka Seng ka pynskhem ruh ba kan iai bteng ban ieng skhem ban iada ia ka hok, ka jingmyntoi bad ka lawei jong baroh ki samla pule ka jylla
