Shillong, Nailar 03: U Superintedent ki pulit ka East Khasi Hills District la pyntip ki ar ngut ki briew kiba la tapkhmat kila leit ban kawang prteol bom ia ka ophis jong ka Meghalaya State Pollution Control Board mynta ka sngi ha ka por shiteng synia por 12.10 baje mynstep.
La iathuh ki don ar ngut ki briew ba la kah iaka durkhmat jong ki bad kila rung jubor hapoh ka phyllaw jong ka Meghalaya State Pollution Control Board (MSPCB), Lumpyngngad, Shillong bad kila kawang da ka petrol bom ha katei ka iing maw. La ong ba utei u petrol bom bala kawang kala dei beit beit iaka kynroh ba shabar jong kane ka iing.
Hadien katei, kitei ki runar kila phet krad noh mar mar na katei ka jingbthei kala pyn kylla rong iaka kynroh. Hynrei ym shym la don ba mynsaw ha ka por ba don katei ka jingjia bad mar mar ia ioh kane ka khubor, ki pulit kila leit mar mar sha katei ka jaka.
La dep khot iaka Crime Scene Unit sha katei ka jaka na ka bynta ban ioh ki sakhi satar bad kiwei kiwei bad la dep registar ia katei ka jingjia ha Laitumkhrah Police Station vide Case No. 121(08)2026 u/s 324(3)(6)/326(g)/3(5) BNS.
La dep ruh ban tohkit halor katei ka jingjia bad la pynkhlain ia ki jingpahara ha katei ka phyllaw jong ka Meghalaya State Pollution Control Board (MSPCB). Na ka liang jong ka District Police, kila trei shitom ban lap bad kem iaki runar ba donkti ha katei ka jingjia.
