Shillong, Nailar 05: Kampher wat hadien ba ka la shah tam shakhmat da 1-0, pynban ka kynhun ialehkai ka Laitkor SC ka la ieng iakhun tyngeh tad haduh ba kan da lah ba kan pynliem ia ka Mylliem SC da 3-1 ha ka jingialehkai ba hynniew ka lympung Shillong Premier League 2026, ka SSA ba la long hynne ka nohphai sngi ha SSA Stadium.
Na ka liang ka Mylliem SC ia kane ka shi kol ka jong ka, la thep da u Caldolan Kharmawphlang (39’). Katba na ka liang ka Laitkor SC, ia ki lai tylli ki kol jong ka, la thep da u Samborwell Mynsong (47’), Hamingbert Nongbet (56’) Bad Risuk Malngiang (69’).
Na bynta kane ka jingiakhun, baroh ar kynhun ki la pynkylla ia la ka jong ka thup ialehkai jong ki, ha kaba na ka liang ka Mylliem SC kam shim la lah ban sei madan ia u Shaibor Nongrum hadien ka red card ba u la ioh na ka jingiakhun ba la dep bad bynrap shuh shuh sa ka jingbym shim la sei madan ia u Kevizakie Ciesotsu bad Fedrick Wahlang bad ha ka jaka jong kine baroh, la wan ban mih bujli da u Donboklang Nongsteng, Donboklang Majaw bad Alem Khongwir.
Katba na ka liang ka Laitkor SC, ka jingkylla ha ka thup ialehkai ka long ba u , Balajiedlang Lyngwa, Shelbilkstar Kharshilot bad Iaryngkatlang Kharkrang ki la wan ban mih ha shwa jong u Samuel Suting, Wadskhem Marbaniang bad Kitdor Kharphuli.
Baroh ar kynhun ki la sdang suki jai bha ka rukom ialehkai ka jong ki, namar ha ka jingiakhun ba nyngkong ka jong ki, ka Mylliem ka la shah pynliem da 1-0 hakhmat ka Nongkseh SSCC katba ka Laitkor SC ka la shah liem haduh 5-0 hakhmat ka Mawlai SC.
Wat la katta ruh, ka kynhun ialehkai ka Mylliem shiteng kynta hadien ba la iaid shakhmat ka jingiakhun, ka la pyrshang ba kan kham nion bha ka rukom ialehkai ka jong ka, kaba hangne u Alem Khongwir u la ioh artylli ki kabu ksiar ban pynkhih ia ka jar ha kaba kawei ka la her noh shabar ka dieng kol kaba ar la lah ban kyrda noh da u rangap kol ka Laitkor u Deranius Wahlang.
Ym slem hadien kane, ba ka Laitkor SC ka la dei ba kan lah ban tam shakhmat hadien ka foul pyrshah ia u Hamingbert, bad u Risuk u la tur shakhmat ban shut ia ka penalty, kaba u la shut jam bha ia ka bol kaba lait beit blait shabar
Haba wan ban bteng ia ka kylla miet, kaba marsien ia sdang, ka la bujli player noh shwa ha kaba u Samborwell u la wan ba un mih madan, kaba marsein ia rung une u player, ka la sdang ban pynkylla ia ka rukom ialehkai ka Laitkor hi baroh kawei.
Hadien ba ka jingiakhun ka la jam shakhmat, ha ki 15 minit ba dang sah ka por ban ialehkai, ka Laitkor SC ka la lah ba kan bat ne ban tehlakam beit ia ka bol tang hapoh jong ka, rtad haduh ba kan da lah syndon ba kan iai tam da 3-1 bad ban khur pura syndon ia ka lai point ka jong ka, kaba khlem pep, lah ban ong ba kane ka la sait khuid lut phar na ka jingmut jingpyrkhat ki player na ka namrem kaba long da 5 kol hakhmat ka Mawlai na ka jingiakhun ba nyngkong.
Haba iadei bad ki jingiakhun ban sa wan jong kane ka lympung, ka SSA kan dang pynkhreh ia ka, da kaba phai khmat shwa sha ka lympung ialehkai ka Durand Cup 2026 , kaba la don bynta da ki lai tylli ki klob jong ka, ba kynthup naduh ka Shillong Lajong FC, ka Langsning FC bad ka Nongkseh SSCC.
