Shillong, Nailar 06: U President jong ka Meghalaya Pradesh Congress Committee u bah Vincent Ch Pala u khot u wer ia ki paidbah ban ia shim bynta ha ka jingiaid paidbah ka ban long ha ka 10/Nailar/2026 ban pyrshah ia ka jingpynkylla ka sorkar pdeng ia ka Foreign Contribution Regulation Amendment Bill, 2026, ban iaid na Fire Bridge sha Don Bosco Point Laitumkhrah ka ban sdang ha ka por 11.00 baje mynstep.
U President ka MPCC u khot u wer ia ki ki nongialam seng bhalang, ki kynhun niam, ki paidbah nongshnong shnong, ki seng samla, ki seng longkmie bad baroh kiba sngewkhia halor ka Foreign Contribution (Regulation) Amendment Bill, 2026, ia kaba la wanrah da ka Sorkar Pdeng ha ka jingïalam ka BJP.
Kane ka Bill ka la pynmih ïa ki jingsngewkhia namar ki jingktah kiba lah ban mih halor ki Balang, ki kynhun trei mon sngewbha, ki jaka pule, ki hospital, ki jaka ri khunswet bad kiwei kiwei ki shlem treikam kiba la shakri ïa ki paidbah jong ka Jylla da ki phew phew snem.
Katkum ki kyndon ba la tyrwa, ki jingdon jingem jong ki kynhun kiba la ïoh jingïarap lyngba ka Foreign Contribution, ki lah ban wan hapoh ka bor jong ka Designated Authority lada ïa ka FCRA Registration jong ki ym shym la pynthymmai, ka la kut noh, lane la kyntait ban pynthymmai.
Kane ka pynmih ïa ka jingkylli halor ka jingïada ïa ki jingdon jingem bad ki shlem treikam kiba la tei da ka jingaiti ban shakri ia ki paidbah.
Kane kam dei tang ka mat jong kawei ka kynhun ne kawei ka niam hynrei ka ïadei bad ki hok paidbah, ka jinglaitluid ban ngeit niam, ka jingshakri mon sngewbha, bad ka jinglong laitluid jong ki shlem treikam kiba shakri ïa ka imlang sahlang.
Namar kata, ka MPCC ka kyrpad ïa baroh lang ba ngin ïeng tylli lang ban pynpaw ïa ka jingsngew jong ngi lyngba ka lynti synshar paidbah.
Ki khot ïa phi baroh ban wan ïashim bynta ha ka ‘jingïakhih kaba jai-jai bad katkum ka rukom synshar paidbah’ ban pynpaw ia ka jingpyrshah ia ki kyndon kiba ngi sngew ba ki lah ban ktah ïa ki hok bad ki shlem treikam kiba la shakri ïa u paidbah.
Kane ka jingiakhih kan long da kaba don-akor, kaba jai jai, khlem jingthombor bad kaba burom ia ka jingsuk bad ka shongsuk shongsain jong ka Jylla. “To ngin ïeng lang bad kawei ka sur ban ïada ïa ki shlem kiba la tei da ka jingngeit, ka jingaiti bad ka jingshakri”.
