Shillong, Nailar 06: Mynta ka Sngi 06/Nailar/2026 ki nongkyrshan ka party Voice of the People Party kila wan ban ia shim bynta ban pynlong ia ka jingiaid paidbah kaba jar jar sha Secretariat ban pynpaw ha khmat ka sorkar ba ka dei ban pyntreikam ia ki 10 tylli ki mat kiba ka party kala buh ha khmat ka sorkar.
Mynta ka sngi ki nongkyrshan ka party kiba la ia poi sha kane ka jingiaid paidbah sha Secretariat ki long palat hajar ngut, ka jingwan ki paidbah ki long khamtam eh na ki ar tylli ki lynti ki don kiba la wan na ki thain Motphran bad ki don kiba la wan na ki thain Civil Hospital Shillong bad ha kane ka jingiaid paidbah la ialum lang ha khmat ka jaka ieng kali Additional Secretariat.
Haba kren ha kane ka jingialum paidbah u president ka VPP u bah Ardent Miller Basaiawmoit u la ong ba kane ka jingpynlong ia kane ka jingiaid paidbah kaba jai jai ka long ban phah ia ka khubor sha ka sorkar ba kim hun ia ka rukom trei kam ka sorkar ha kiba bun ki bynta.
U President u la ong ba ia kita ki mat kum ka party kala kren na ka por sha ka por, na ka liang jong ka party kala rai ba kan nym phah kano kano ka dorkhas namar kila ju thoh na ka por sha ka por hynrei ka sorkar kam ju jubab ne ban khot ia kren kumta kam don jingmut ban phah jingthoh.
Kum ki nongkyrshan jong ka party ki sngewthuh shai ba kin leh ia kaei kaei kaba dei bad kim don kano kano ka jingthmu ban pynthut ia ki paidbah bad la bthah da kaba shai ba kiba wan ban iashim bynta ki dei ban burom ia ka jingbthah jong ka party bad ha kajuh ka por u president u la pynpaw ia ka jingsngewkmen ba khlem don ka jingpynlut katne u paidbah u la iawan.
