Shillong, Nailar 06: Ka Khasi Students’ Union (KSU), Shillong Mihngi Circle, ha ka 6 tarik u Nailar 2026 ka la ïoh pdiang ia ka shithi ba phah da u Director ka Urban Affairs Department halor ka jingujor ba ka Seng ka la phah shaphang ka jingtei be-aiñ ïa ka ïingmane (temple) hapoh ka phyllaw jong ka ophis CBI ha Mawdiangdiang, kaba dei ka jaka Sorkar.
Ha kane ka bynta, ka New Shillong Township Development Agency (NSTDA) ka la phah da ka shithi sha u Deputy Inspector General bad Head of Branch, CBI, Shillong, kaba dawa ïa ka jingpynshai halor katei ka jingtei.
Ka Seng ka kwah ruh ban pynpaw ba ha ka shithi jong ka NSTDA la kdew shai ïa ka Lease Agreement hapdeng ka Agency bad ka CBI, kaba la soi ha ka 14 tarik u Naiwieng, 2018.
Katkum ka Clause 10 jong katei ka jingïateh soskular, ym shah satia ban shna ïa kano kano ka ïingmane ne ban pynkylla ïa kino kino ki jingtei kiba don lypa hapoh katei ka jaka khlem da ïoh shwa ïa ka jingmynjur na ka NSTDA.
Ka jingmih jong kane ka shithi ka long ka sienjam kaba kongsan ha ka jingïakhun jong ka Seng ban pynskhem ba baroh kiba pyndonkam ïa ka jaka Sorkar, kynthup ïa ki shlem jong ka Sorkar Pdeng, ki dei ban bud ryntih ïa ka aiñ bad ïa ki kyndon jong ka jingïateh soskular.
Ka Seng ka ngeit skhem ba ka Sorkar bad ki bor ba dei peit kin bishar bniah ïa ka Lease Agreement bad kin shim ïa ki sienjam kiba donkam katkum ka aiñ. Ka Seng ka dawa ruh ba lada lap ba katei ka jingtei ka la pynkheiñ ïa ki kyndon jong ka jingïateh soskular, dei ban pynpra noh ïa ka katkum ka aiñ.
Ka jingiatheh kular ka kdew shai ba ym shah satia ban shna kino kino ki jingtei lait noh tang ïa ka ophis bad jaka sah ba la mynjur, hynrei ka Seng ka ïohi ba ïa kane ka kyndon la pynkheiñ khlem khein snep iaka jingiateh soskular.
Kumta ka Khasi Students’ Union, Shillong Mihngi Circle, ka kyntu ïa ki bor ba dei peit ba kin pynlong ïa ka jingtohkit kaba hok, kaba khuid bad kaba kloi halor kane ka kam, bad ban shim ïa ki sienjam katkum ka aiñ bad katkum ki kyndon jong ka Lease Agreement. Ym dei ban don mano mano ne kano kano ka shlem kaba lait na ka jingbud ïa ka aiñ bad ïa ki kyndon kiba synshar ïa ka jingpyndonkam ïa ki jaka Sorkar.
Ka Seng ka kwah ban pynshai ba ka nongrim jong kane ka jingïakhun kam dei satia pyrshah ïa kano kano ka niam ne ïa kano kano ka jaitbynriew. Ka nongrim jong ka Seng ka long ban ïada ïa ka hok bad ka jingïaid beit jong ka aiñ, bad ban pynthikna ba ym don mano mano, khamtam ki briew kiba wan nabar, kiba lah ban kam trai ne leh trai khlieh ïa ki jaka paidbah ne ki Revenue Land da kaba pynkheiñ ïa ki aiñ bad ki kyndon kiba treikam. Kumta, ka Seng kan ïai iïeng skhem ban pyrshah ïa kino kino ki kam kiba pynkheiñ ïa ka aiñ, khlem jingïapher ïa mano ba leh ïa ki bad kan iai bteng ba buddien ia kane ka kam.
