Shillong, Nailar 09: Ha ka jingiatreilang ki pulit ka West Jiantia Hills District bad tnad syntiat la ioh ban kem ar ngut ki nongkhaii drok na Phramer Jowaib ala kot sha ka 48.78 gram ha ka dor T.7 lak tyngka ha ka sngi Saitjain 8/Nailar 2026.
Ka tnad syntiat kala ioh jingtip ba ka don ka kali kaba mih na Silchar ban wan sha Shillong kaba don ia u number ML-05-T-838, ki pulit kila pynlong ia ka jingpynap shrip ha surok bah NH-06 ha Phramer bad haba katei ka kali kala poi kila bat ia ka.
Haba kila pynlong ia ka jingtalasi ia ka kali la lap ia u drok bala sng haki ar tylli ki synduk bala kot sha ka 48.78 gram, ki briew kiba don ar ngut ha kane ka kali kiba la tip kyrteng kum u Robert Nongrum 33 snem bad u Batskhemlang Jarain 32 snem kila shah kem ha ki pulit.
Ki pulit kila sdang ia ka jingthohkit ban lap ia kiba don kti ha kane ka kam khaii bad ki mut ban rah shaei bad na ka liang jong ka State Anti-Narcotics Task Force, Meghalaya kala trei shitom ban pynthikna ba ka jylla kan leit na ka jingdig drok.
