Shillong, Nailar 08: Ka Khasi Students’ Union kan pynlong beit ka jingïalang paidbah ha u Mot Kiang Nangbah ha Khliehriat ha 11 tarik Nailar, 2026 wat lada ki bor pyniaid jong ka District kim kwah ai jingbit.Ka Seng ha 6 tarik Nailar, 2026 lyngba ka KSU East Jaiñtia Hills District Unit ka la thoh sha u DC ka EJHD ban ai jingbit ban pynlong ïa ka jingialang ban pynshai paidbah halor 5 tylli ki mat jingdawa ba ka Seng ka lah buh ha khmat ka Sorkar Jylla. Hynrei na ka liang jong ka DC office ka la pynpoi ka shithi ba kam lah ban ai jingbit namar ka don ka jingmana na ka liang jong ka District ba ka la pynjari ïa ka kyndon S. 163 jong ka BNSS ha 20.05.2026 kaba mana ban lum ban lang palat 5 ngut hapoh u pud jong ka DC office.
Ka Seng ynda la ioh pdiang ïa kane ka shithi ka dap da ka jingbitar hynrei ha kajuh ka por ka dap ka jingsamrkhie halor ka jingbiej jingkale jong ki nongpyniaid ka District khamtam u DC. Ka daw ka long ba ki bor district kim shim tip bniah halor ki kyndon jong ka S.163 BNSS lane ki tip kham bha hynrei ki thok ki shukor ïa u paidbah.
Kane ka lah pynlong ïa ka Seng ban thoh sa kawei ka shithi ban pynrem ïa ka jubab jong ki bor distrik ka EJHD. Ha ka shithi ka Seng ka lah pynshai ba ïa ka S.163 BNSS la pyntreikam naduh 20.05.2026 namar ka mih ka jinghuri hura ha kato ka por hynrei kata kam shim mut ban ka jingmana lyngba ka S.163 BNSS kan neh junom bad ka S.163 BNSS ka iap noh hadien 2 bnai. Hynrei ki bor district lehse kim tip ïa kata lane ki mut ban thok da kaba thoh sha ka Seng ba kim lah ban pynlong jingïalang ha khmat u mot Kiang Nangbah namar ka don ka jingmana lyngba ka S. 163 BNSS.
Ka jing jubab jong une u DC ka EJHD ka dang pynskhem shuh shuh ïa ka nongrim jong ka Seng ban weng kam ïa une u briew, ym namar tang halor ka jingjia jong ka Shree Cement ha kaba u DC u lah thombor ïa ki paidbah ba pyrshah hynrei ha kajuh ka por ruh ba ka Seng ka sngewthuh ba u dei hi u briew u bym ler trei kam namar um tip halor ka aiñ.
Ka Seng ka pynshai ruh lyngba ka shithi ba kam shim don jingthmu eiei ban wanrah ïa ka jinghuri hura hapoh DC office, Khliehriat bad kam kwah hi ban buh jingïalang hangto, hynrei ka shu jia ba ka Mot Kiang Nangbah u don ha katei ka jaka hapoh u pud u sam jong ka DC office takadaw ka kwah ban buh jingïalang ha u mot.
Ka Seng ka kwah ban buh ïa ka jingialang kaba jai jai khlem kano kano ka jingkulmar bad ka kwah ban pynshai ïa ki paidbah halor ki mat jingdawa ka jong ka. Hynrei lada ki bor pyniaid ki pynwit lane mana ïa ka jingkwah jong ka Seng ban pynlong ïa ka jingialang kaba jai jai, na ka liang ka Seng kam tieng ban thom da ka bor ruh kumba ki bor pyniaid bad ki bor pulit ki thom da ka bor ïa ki paidbah ba pyrshah ïa ka Shree Cement.
Ka Seng lyngba kane ka kyrwoh ka kwah ban phah ïa ka khubor kaba shai sha ki bor pyniaid jong ka EJHD ba kin ailad ïa ka Seng ba kan pynlong ïa ka jingïalang kaba jai jai lem kumta ka Seng kan hap ban shim da kiwei pat ki sienjam.
