Shillong, Nailar 10: Ka rynsan ka la long kaba la pynkhreh naka bynta ban pynlong ia ka lympung iakob siat khnam ba la tip ia ka kum ka Meghalaya State Archery Championship, kaban pynlong ia ka da ka Archery Association of Meghalaya (AAM), ia kaba la iarap ban kyrshan lang da ka tnat jong ka Directorate of Sports Youth Affairs, ka sorkar jylla.
Ia kane ka lympung bah iakob siat khnam, ka AAM kan pynlong ia ka ha ki lai sngi, katta naduh lashai ka sngi Hatmajai jong ka taiew ha jaka siat khnam (archery shooting range) jong ka SAI, STC, NEHU NEHU bad ba kan kut ha ka sngi Palei.
Kongsan ban leit ban plie ia ka pyrda kane ka jingiakob dei kong Isawanda Laloo (IAS) Secretary Sports & Youth Affairs Department ka sorkar jylla.
Kat kum ba la pynkhreh la ioh jingtip ba ki nongwan iashim bynta sha kane ka jingiakob na baroh ki distrik kiba don ha ka jylla, ki la wan poi naduh mynta ka sngi, ha kaba ia kane ka jingiakob yn pynlong ha ka iakob siat kynhun (team) para marwei (individual) jong ka Recurve bad ka Compound.
Ban shu kyrtiang dien khyndiat shwa ka jingsdang kane ka lympung, ka ialehkai siat khnam ha ka jylla, lah ban ong ba ka la don ki dak jong ka jingkiew, kaba la wan hadien ba ki nongialeh kai ka jylla ki la lah ban ioh ban khur artylli ki takma ksiar bad kawei ka takna rnong na ka 1st Khelo India Tribal Games ba la long ha u bnai Ïaiong mynta ka snem.
Nalor katta la ioh jingtip ba ka jingthmu ha lyndet ka jingpynlong ia kane ka jingiakob ka long ruh ban khreh ban sei madan ia la ki rang bad thei ialehkai kiba tbit bad ba kynsai, ban mihkhmat ia ka jylla sha ka lympung bah ialehkai 39th National Games, kaban long ha kane ka jylla ha u snem 2027.
