Shillong, Nailar 10: Ka KSU ka shnat Laban Circle lyngba ka tnad trei kam ba peit ia ka pule puthi hapoh ka Jingialam u shongknor u samla K. Nelson Wanrap bad u Secretary u samla Andrew P. Kharbithai mynta ka sngi 10/Nailar/2026 ki la ioh ban wan kynduh ia ki principal jong ar tylli ki skul ka Laban Bengalee Boys Higher Secondary School bad Laban Bengalee Girls Higher Secondary School.
Ha kane ka jingiakynduh ia ki principal jong kitei ki ar tylli ki jaka pule kila dawa ba dei ban pynrung noh ia ka subjek Khasi ha kine ki skul, ka seng kala leit ban buh ia kane ka jingdawa ka long ba hadien ba kila ioh ia ka jingujor na ki kmie ki kpa ba kam don ka subjek khasi ha kine ki ar tylli ki skul kaba dei ka ktien trai ka jylla.
Kine ki ar tylli ki skul kila don ha katei ka thain Laban mynta la palat shispah snem, hynrei kine ki skul kim shym la pynrung ia ka ktien khasi kumba ka seng ka dawa ba dei ban pynrung ia ka ktien khasi khnang ba ki samla kiba pule ha kine ki skul kin ioh jingmyntoi.
Ban shu pynkynmaw ba kane kam dei ka sien kaba nyngkong ba ka seng ka leit mih bad dawa ban pynkynthup noh ia ka subjek khasi ha ki skul.Ka Kyrwoh na ka liang u shongknor ka tnad pule u dawa ba baroh ki skul kiba don ha ka dong ka thaiñ Laban hi baroh kawei ki bym don ia ka subjet Khasi ki dei ban pynrung noh ia ka ha ki skul ki jong ki.
