Shillong, Nailar 11: U nongtem guitar ba pawnam ka ri Poland u Marcin Patrzalek un wan tem ha Lariti Performing Centre Mawkasiang Shillong bad kane ka dei ka sien kaba nyngkong ba un wan sha kane ka jylla Meghalaya kaba la paw ha ka pyrthei kum ka pdeng ka put ka tem.
Ia une u nongtem ba pawnam ka ri Poland bad kumjuh ruh ha ka pyrthei la wanrah da ka kynhun Forward Lifestyle and Experiences LLP da ka jingiatrei lang bad ka Meghalayan Age Limited, ha kaba ki nongtem na kane ka jylla kin iadon lang lashai ka sngi.
Haba kren ha ki lat pathai khubor u Marcin u la pynpaw ba kan long ka sien kaba nyngkong na ka bynta jong u ban poi tem ha ka jaka ba kham long kyndong kane ka dei kaba u don ha ka jingmut jingpyrkhat jong u hynrei haba u la poi ha kane ka nongbah Shillong kala pynkyndit ia u ba kam don ka jingiapher ha baroh ki liang na ki ri sepngi.
U la pynpaw ka jingsngewkmen ka jong u ba un ioh ban tem ha kane ka nongbah Shillong nalor kiwei ki jaka kum ka Delhi bad ka Bengaluru, u ong ba u khmih lynti ba un iohi ia ki nongput nongtem na kane ka jylla bad kane kaba u angnud ban sngewthuh ia ka rukom tem jong kane ka thain.
U la ong ba ha kine ki lai snem lynter u la leit ban tem kylleng ka pyrthei bad na ka liang jong u, u sngewthuh ia kaei kaba ki briew ki pyrkhat bad u sngewthuh ba kane ka nongbah Shillong ka dei ka jaka kaba ki briew ki ieit ia ki jingrwai khamtam ia ki jingrwai na ki ri sepngi u la dei lypa na ka dewbah Europe un kham sngewtynnad shuh shuh ban ia kynduh ia ki nongtem bad ki nongrwai jong ka jylla.
