Shillong, Nailar 11: Ka Dr. K.L.Iawbor ka Project Director Meghalaya Aids Control Society (MACS) kala pyntip ba u myntri ka koit ka khiah ka jylla u bah Wailadmiki Shylla un sa plie paidbah kumno ban pynsngewthuh ha kaba iadei bad ka jingpang Niangkhulia ha Lady Keane College Shillong lashai ka sngi 12/Nailar/2026.
Ka Dr. K.L.Iawbor kala ong ba kane ka Information Education and Communication ka long ban pynsngewthuh ia ki riew paidbah, kynthup ia ki long kmie, ki khun samla ki long kpa, ha ki skul bad ki kollej kane ka long ba kin ioh ia ka jingtip kaba bniah halor ka jingsaphriang jong u ne u jingpang Niangkhulia u ioh ban rung ha ka met jong u briew.
Ka Project Director kala pynshai ba u jingpang Niangkhulia u ioh ban rung ha ka met jong u briew ka long ha ki saw bynta, kaba nyngkong ka dei ka jingiapoikha pathar, ka jingbympyndonkam ia ki lad jingiada kaba ar ka dei ka jingpyndonkam lang da u juh u thyrnia ba don ia une u khniang jingpang bad kito ki briew kiba dih drok.
Kaba lai ka jingpur jong une u khniang jingpang na ka kmie sha ki khun ha ka por ba armet ha ka por ba kha bad ka por ba ai buin kaba saw pat ka dei lyngba ka jingioh ia ka snam kaba don ia une u khniang jingpang haba ai snam dei ban pyntikna ba uto u briew u ba ai snam u dei u ba lait na ka jingpang Niangkhulia.
Kane ka jingpynlong ia kane IEC ka long ban pynduh pyndam ia ka jingibein ne ka jingniewbein khamtam ban pynduh ia ka jingngeit biej ha kaba iadei bad kane ka jingpang Niangkhulia bad haba la tip bniah lah ban iada ialade ka jingdon kane ka HIV Aids Act kaba teh lakam ia uwei pa uwei ba ym dei ban niew bein namar kine kiba don ia u ne u khniang jingpang Niangkhulia ruh ki don ka hok ban ioh ia ka lad ban im bad ba kin ioh ia ki jingmyntoi ha ki skul ne ki kollej.
Kaba kongsan ka long haba ki briew kila sngewthuh ia kane ka jingpang ki dei ban wan sha khmat ban test bad ban tip ha kano ka bynta u ne ka ki don, la ki don ne kim don ia uta u khniang jingpang, lada kiba don kin shim ia ki lad jingiada ban dih tista ia ki dawai bad lada kim don ruh ki dei ban nang ban iada ialade.Kane ka jingpeit bniah ialade kan sdang naduh lashai ka sngi 12/Nailar/2026 bad kan kut ha ka 12/Risaw/2026 bad kane kan long ha baroh ki jylla.
Ka Dr. kala iathuh ba tang na u bnai Iaiong, Jymmang bad Jylliew kiba ioh ia kane ka jingpang ki long 500 ngut, ki long kmie kiba armet kila don haduh 60 ngut, la ong ba ynda la leh ia kane ka jigwad bniah ki briew kin sa sngewthuh bad shi sien ba ki dih ia ki dawai ki lah ban im tymmen ruh haduh 80 snem kaba kongsan ka long ba hap ban dih tista man ka sngi ia ki dawai namar ki dawai ki pyntlot bor ia une u khniang jingpang la iathuh ruh ba ka East Jaintia Hills ka dei ka District kaba bun eh kiba don ia une u jingpang Niangkhulia.
