Shillong, Nailar 12: U bah Wankitbok Pohshna u State General Secretary ka BJP u la ong ba u myntri ka sorkar pdeng u Amit Shah u long u ba la kloi ban jubab ia ki mat iakren hapoh Parliament hynrei ka seng Congress hapoh ka jingialam u Rahul Gandhi kam shym la ai lad ba kan iaid beit kila pynthut da kumne da kumtai.
U Nongialam ka BJP ha Meghalaya u la pynkynmaw ba u Rahul Gandhi nyngkong u la dawa ba u myntri ka tnad pule puthi u Dharmendra Pradhan u dei ban iehnoh kam bad u la dawa ba dei ban iatai bha haba iadei bad kane ha iing dorbar.
Haba iadei bad kane ka bynta ka sorkar ym tang ba kala ai lad ban iatai hynrei kala wanrah syndon da ka ain kaba pynpyrkhing shuh shuh ia ka rukom pynlong ia ka eksamin ha ka ri baroh kawei ka sorkar kala shim khia halor ka jinglait tuh ki jingkylli jong ki eksamin bapher bapher bad la pynkiew ruh ia ka jingpynshitom lada lap ia kiba leh bakla.
Naduh ba sdang ia ka dorbar Lyiur ha u Naitung ka sorkar kala plie lut ia ki lad ki lynti ban don ka jingiatai halor ki mat baher bapher bad khamtam ban warah ia ki ain kiba donkam hapoh ka ri, hynrei na ka liang pyrshah kaba la ialam da ka seng Congress kam shym la ai lad kane ka paw shai ba ka seng Congress kam burom shuh ia ka iing kyntang kaba dei ka iing Dorbar hapoh ka jingialam u Rahul Gandhi.
