Shillong, Nailar 12: Ka ophis jong u Lat ka jylla Governor Secretariat, Meghalaya, Shillong kaba dei shaphang ka jingpynkhreh ban pdiang paidbah ha Lok Bhavan ha ka sngi rakhe pyndep 80 snem ka jingioh laitluid ka ri India.
Ki khubor ba kongsan na kane ka jingpynbna ki long ki sngi bad ka por plie ka Lok Bhavan kan sa plie paidbah ha ka 15 tarik Nailar 2026 naduh ka por 1:30 baje nohphai sngi haduh 8:00 baje janmiet bad ha ka 16 tarik Nailar 2026 naduh ka por 11:00 baje mynstep haduh 8:00 baje janmiet.
Ka ophis jong u Lat kala kren shai ba ym donkam ban siew iaka bai rung na ka bynta baroh bad yn sa don ki jingiasiat bad shad tynrai, ha kaba yn sa don ka jingialehkai bad shad tynrai na kiba bun ki jylla ka ri India.
Kane kan kynthup iaka Bhawai bad Kalbelia na Rajasthan, ki jingshad tynrai na Jammu bad Kashmir, ka Bharatanatyam na Karnataka bad ki jingshad tynrai na ki jaitbynrew Khasi, Jaintia, bad Garo ka jylla Meghalaya. Kan don ruh ka jingshad lane jingtem na ka Military Band ka Assam Regimental Centre.
Katba kiwei ki pat ki prokram ha katei ka sngi kan don ka jingpyni nam shaphang ka rep ka riang, ki dukan bam tynrai bad ka jingpyni nam iaki kti bad ki thoh kiba rim. Ka jingthmu hangne ka long ka jingkylla ka kyrteng na Raj Bhavan sha Lok Bhavan bad ka jingplie paidbah iaka, ka long ban pynneh iaka jingsngew thikna ba kane ka jaka ka dei ka iing jong u paidbah.
