Shillong, Nailar 12: Ki jait bynriew Tibet kiba la shah pynryngkang par ha ka ri China ha kaba kala klun ia ka ri Tibet da ka thma, mynta ka sngi 12/Nailar/2026 ki Tibetan kila pynlong ia ka jingiakhih ha Khyndailad kaba shi kynta da ka khap lyndum bad thang mombati ban pynpaw ia ka jingpyrshah ia ka jingklun jubor ia ka ri jong ki.
Ha kane ka sngi kum ka kynhun Tibetan kila pynpaw ruh ia ka jingsngewsih ba u wei na ki dkhot u la thang im ialade ha ka 2/Naitung/2026 ha khmat ka ophis bahakhlieh duh jong ka United Nation ha ka nongbah New York ha America ban pynpaw pyrshah bad ban kyntait ia ka ain kaba ka ri China kala shna kaba la tip kum ka Ethnic Unity Law kaba ki pyrshah namar ki dang iakhun ban ioh ia ka jinglaitluid na ka jingsynshar donbor ka ri China.
Ha kane ka sngi ki rangbah bad ki longkmie da ka mon sngewbha kila shah ban khih lyndum ia ka khlieh ka jong ki ban pynpaw sha ka pyrthei baroh kawei ba ki pynrem jur ia ka jinglehdonbor ka China bad ha kajuh ka por ban pynpaw sha ka pyrthei ba ka jingialeh laitluid ka jong ki wat la ki don shabar na ka ri ka jingiakhih kan nang iai bteng.
Ha ka jingkren ka Tenzin Sangmo kawei na ki nongialam ba ha khmat jong ka jait bynriew Tibet kala ong ba ka jingiakhun ban ioh biang ia ka jinglaitluid na ka jingshah klun jubor ha ka ri China ka dang iai bteng bad katkum kane ka ain Ethnic Unity Law kala batai shai ba ka long beain ia ki jait bynriew Tibet wat la ki don ha kano kano ka bynta ka pyrthei ban iakhih pyrshah ban dawa ia ka jinglaitluid.
Hynrei kum ka jait bynriew kin nym riej kin dang iai bteng ia kane ka jingialeh pyrshah ia ka jingthombor ka ri China haduh ba kin da ioh ia ka jinglaitluid kala ong, ha khmat jong ka ri China bad kane ka jingialang kaba ki pynlong mynta ka sngi ha Shillong kum ka jait bynriew Tibet la niew beain ha khmat ka China hynrei kin nym kynran dien namar ka jingialeh ban ioh ia ka jinglaitluid na ka jingshah synshar donbor ha ka ri China kan dang iai bteng bad ki don ka jingngeit skhem ba kin sa ioh biang ia ka jinglaitluid.
