Shillong, Nailar 17: U Myntri Rangbah ka Meghalaya Conrad K Sangma, mynta ka sngi ula plie paidbah ia ka “Pine Home” Eco-Sustainable Project ha Shnong Mawlangwir, Mawkyrwat, ha South West Khasi Hills ha ka jingiadon lang u Symbud Myntri Rangbah Bah Prestone Tynsong bad Myntri kam Jngohkai Timothy D Shira.
Ula plier uh ia ka Twahlongwar Open-Air Museum ha Mawsynram, kaba pyni ia ka jingphaikhmat jong ka Sorkar sha ka roi ka par kaba neh bad ka jingsumar ia kiei kiei ba ai pateng da ki menbarim.
Haba ai jingkren ha ka jingialang, u Myntri Rangbah ula pynpaw ba ka Pine Home la pyni ia ka nuksa jong ka roi ka par ha kaba ka jingpynneh pynsah, ka jingstad ka thain bad ki buit treikam ka juk mynta ki iawan lang shijaka. Ula pynpaw ba ia kane ka projecr la pynwandur ba kan ym ktah ia ka mariang, pynneh pynsah ia ka jinglong ki jaka haba pyniasoh lang ia ki rukom treikam kiba iada ia ka mariang kum ka jingpyndonkam ia ki tiar ba lah ban recycle, ka jingtyngkai ia ka um bad kiwei kiwei.
Ula ban jur ia ka jingkongsan ka jingiashimbynta ki shnong ki thaw bad ki nongthain jingthain kti ka thain, nongshna tiar bad ki nongtrei kiba shim ia ka bynta ba kongsan ha ka jingtei ia ka.
“Ki tiar ba pyndonkam ha kane ka project ki dei kiba pynmih hi na ka thain, da ka jingthmu ban kyntiew ia ki mar kiba don ha ka thain bad ka sap” ula ong.
U Myntri Rangbah ula pyntip shuh shuh ba ka Sorkar kala kynshew kumba T.5.90 klur ha ka project lyngba ka Saitsnat Multipurpose Cooperative Society. Kane ka Pine Home ka don ruh ia ka Restaurant bad ka Communital Hall, ka Conference bad Training Hall, ka Guest Room, ka Tourism Information Centre bad kiwei kiwei ki jingdonkam.
Haba ban jur ia ka thong kaba iar, ula pynpaw ba ka Sorkar ka thmu ban pynkylla ia ka South West Khasi Hills sha ka jaka wankai kaba ki nongwankai kin sah kham slem bad synniang sha ka ioh ka kot ka thain. Ula pynpaw ruh ia ki jingpyrshang ba dang iaid hapoh ka CM Homestay Mission, kaba thu ban pynkha haduh 3000 tylli ki Homestay ha kylleng ka Jylla hapoh u 2028, ka ban ai ia ka lad ba bun bah ha ka iohkam iohjam.
Ula ban biang ba kum kine ki sienjam ki pyni ia ki buit treikam ka Sorkar ban kyntiew ia ka kam jngohkai kaba neh, pynkhlain ia ka jinglong trai ki shnong ki thaw, bad pynthikna ba ka jingmyntoi ha ka ioh ka kot kan iai long beit jong ki trai shnong.
Kiba la iadonlang ki kynthup ia u MLA Bah Renikton L Tongkhar, u Chief Secretary Dr Shakil Ahammed, Commissioner & Secretary Kong Rosetta Mary Kurbah, ha ryngkat ki bor pyniaid ka District, ki Khlieh Nongsynshar bad ki nongmihkhmat na ki seng ba iatreilang.
Ula shim ruh ia ka kabu ban pyntip ha ka jingialang halor ka Chief Minister’s Research Grant, ha kaba la kyrshan haduh 48 ngut ki scholar ha une u snem ba nyngkong.
“Bad lyngba ka ‘Tracing the Roots’, 75 ngut na ki scholar jong ngi, kin leit sha Vietnam, Cambodia bad Tibet ban wad bniah ia ka tynrai bad ka jingiaid lynti ha ka jingkrih shnong jong ki Khasi, Jaintia bad Garo. Ka Jaidbynriew kaba tip nangno ka wan ka iaid da ka jingsngewskhem kaba kham khlain sha kano kano ka jaka ba ka leit” ula bynrap.
Ula ban jur ruh ba ka Sorkar kala ai ka jingkular ba ka roi ka par kan ym sangeh tang ha ki khapsor ka Shillong.
“Ka ri-lum Garo, ri-lum Khasi bad ri-lum Jaintia kin kiew ryngkat lang. Mynta, ha ka shnong ha South West Khasi Hills bad ha ka ranab lum ha Mawsynram, kata ka jingkular kala sdang ban wandur” ula ong.
Kane ka project ka dei kaba iatreilang hapdeng ki Tnad bapher bapher ka Sorkar bad kiwei ki Kynhun ba don bynta, kata ka Tnad Jngohkai, Meghalayan Age Ltd, Picasso Pupils, EMAGE Architecture, ka Saitsnat Multipurpose Cooperative Society bad ki nongshongshnong ka Mawlangwir bad Wahmawpat.
