Shillong, Nailar 17: U Myntri Rangbah ka Jylla Conrad K Sangma, mynta ka sngi ula ong ba ki surok ki don ia ka bynta ban wanrah ia ka jingkylla kaba plie lad ia ka jingkiew shakhmat jong ki district ba sha jaka kyndong, haba buh ia u mawnongrim ban shna pynheh ia ka surok Weiloi-Mawkyrwat-Rangthong ha South West Khasi Hills.
Ka project ba T.140 klur, bala bei pura na ka pla pisa ka Jylla, ka dei u mawmer jong ka jingpyrshang ka Sorkar ban pyniar ia ki lad pyniasoh bad pynthikna ba ka roi ka par ka poi shabar ka Shillong sha ki jaka ba kyndong eh jong ka Jylla.
U Symbud Myntri Rangbah Bah Prestone Tynsong, Myntri kam Jngohkai Timothy D Shira, MLA Bah Renikton Lyngdoh, Pius Marwein, Olan Sing Suin bad Dr Celestine Lyngdoh, kila iadonlang ha kane ka jingialang.
Haba ai jingkren ha ka jingialang kaba heh bha, u Myntri Rangbah ula ban jur ba ki jingkynshew pisa ha ki jingtei haba kut ki dei ki jingkynshew ha ki briew. “Man ka tyngka ba ngi theh ha ki lad pyniasoh kam dei kaba pynlut tang ha ka rong bad u maw. Ka dei ka jingkynshew ha ki briew – ba katno ka jingsuk ia ki Kmie ba kin poi sha ki hospital, haduh katno u khynnah un lah ban poi skul thikna, bad katno ka jingsngewskhem u nongrep ban pynpoi mar sha ki iew” ula ong.
Haba kren halor ka jingphaikhmat jong ka Sorkar ban pynbiang tarajur ia ka roi ka par ha man ki thain, ula ban biang ba ka khana jong ka roi ka par ka Meghalaya ka dei ban kynthup ia baroh ki district kiba don sha jngai. “Ka thong jong ngi ka long kaba shai –ym don ki thain, ym don ki district ki ban shah ieh shadien. Ka roi ka par ka dei ban sdang na ki jaka ba kyndong eh bad poi sha man ki shnong ki thaw” ula ong.
U Myntri Rangbah ula pynpaw ba ki district kiba la shah iehbein bha baroh shikatta kum ka South West Khasi Hills, South Garo Hills bad East Jaintia Hills, kila don mynta hapdeng eh jong ki mat pynroi ka Sorkar. “Kaei kaba shisien ka por la khein kum ki jaka kyndong bad la iehbein, mynta kila kylla long ki jaka pynroi. Ka lynti treikam jong ngi ka long ban pynthikna ba ka roi ka par kan sdang na kine ki jaka” ula bynrap.
Haba kren halor ka project, u Myntri Rangbah u pyntip ba naduh u snem 2018, palat T.850 klur ki project la pyntrei ha South West Khasi Hills, bad ki jingkular bala khein lang kila poi mynta jan ia ka T.990 klur.
Kine ki kynthup ia ki surok, ki skhim pynpoi umbam umdih, ki jaka pule, ki jaka sumar bad ki kam pynroi ba iadei bad ki kam jngohkai, kaba pyni ia ka rukom treikam kaba bniah bad ba pynioh bynta lang ha ka jingpynroi iaki district.
Ula pynpaw ruh ba palat ia ka 3200 km ka surok lah dep ban shna ha kylleng ka Jylla Meghalaya ha kine ki phra snem bala leit noh-kaba long jan kumba 1 km ha ka shisngi-kaba pyni ia ka jingkyntur ka bym pat ju jia mynno mynno ruh ha ka lad pyniasoh.
“Kane ka surok Weiloi-Mawkyrwat-Rangthong kan plie ia shibun ki lad ha ka kam jngohkai, ka rep ka riang, ka khaii pateng, bad pule dangle. Ka lad pyniasoh ka dei u budlum kaba wanrah ia baroh ki kam pynroi” ula ong.
Kane ka project kan kyntiew bhah ia ka kam jngohkai ha South West Khasi Hills haba pynkhlain ruh ia ki lad pyniasoh sha ki iew ki hat ia ki nongrep bad ki nongsengkam lajong.
