Shillong, Nailar 25: Ka Shillong General Post Office (GPO) kadei kawei na ki 14 tylli ki iing dak ba la pynthymmai ha kylleng ka ri kaba la plie paidbah mynta ka sngi lyngba ka bor internet da u Jyotiraditya M. Scindia, Myntri ka Sorkar Pdeng ba dei khmih ia ka Tnad Communications bad Development of North Eastern Region (DoNER), kaba long ka sienjam kaba kongsan ban pynthymmai ïa ki jingdon jingem ba iadei bad ki iing dak bad ban pynkhlaiñ ïa ka jingai jingshakri ba la pyniaid da ka teknoloji.
Ïa kane ka jingplie paidbah lyngba ka bor internet la pynlong kum shi bynta ka prokram ha ka ri ha Rang Bhavan, New Delhi, ha kaba u Scindia u la pyllait ruh ïa ka Dak Seva App bad ka Dak MITRA App ha ka jingïadon lang u Dr. Chandra Sekhar Pemmasani, Myntri Khynnah ka Tnad Communications bad Rural Development.
Ha nongbah Shillong, ha kane ka prokram la wan ban ïashim bynta da ka Dr. M. Ampareen Lyngdoh, MLA; u Joseph Lalrinsailova, Chief Postmaster General ka North Eastern Circle, Shillong; Bah Monjurlang Dkhar, Executive Engineer ka Postal Civil Division; bad u Yow Peter Raiphea, Deputy Director, P.A. & F., North Eastern Circle, ryngkat ki ophisar bad ki nongtrei jong ka Tnad Posts.
Haba ai jingkren ha kane ka prokram, u Jyotiraditya M. Scindia u la ong ba hapoh ka jingïalam jong u Myntri Rangbahduh ka ri u Narendra Modi, ka Tnad Posts ka la shim ïa ki sienjam kiba kongsan ban pynthymmai ïa ki jingshakri jong ka bad ban pyniar ïa ka jingai jingshakri jong ka sha ki nongshong shnong. U la ong ba ka jingpynkylla ka long ban pynlong ia ki kam iing dak kiba kham sted, kiba lah ban ioh bynta bad kiba lah ban shimkhia katba dang bat ia ka rukom ai jingshakri jong ka India Post.
U Myntri Sorkar Pdeng u la ong ba ka jingplie paidbah ia ki digital application bad ka jingplie ia ki iing dak ba la pynthymmai kadei ka dak kaba kongsan ha ka jingpynkylla ia ka India Post. U la ban jur ia ka jingpyndonkam ia ka teknoloji bad ka bording ba lah ban pynthymmai ban pynkhlain ia ka kam jong ki iing dak bad ban pynthikna ba ki jingshakri kin poi sha ki nongshong shnong da kaba suk, kynthup ia ki jaka ba jngai tam.
Ka Dak Seva App ka wanrah lang ïa ki jingshakri iing dak kiba bun jait ha kawei ka rynsan digital. Ki briew ki lah ban pyndonkam ïa kane ka app ban wad ïa ki post office, ban book bad ban buddien ïa ki parcel, ban phah wan shim, ban siew da ka lad digital bad ban ïoh ïa ki jingshakri ba la jied kiba ïadei bad ka Postal Life Insurance (PLI), Rural Postal Life Insurance (RPLI) bad Post Office Savings Bank (POSB).
Lah ban ioh ha ki 23 tylli ki ktien jong ka ri, ka Dak Seva App ka ialeh ban pynlong ia ki jingshakri jong ki iing dak kiba kham suk ia ki nongshong shnong bad la thmu ba kan nang kylla sha ka rynsan ai jingshakri ia ki nongshong shnong kaba pura.
Ka Dak MITRA App, kaba la pyntreikam ha kumba 1.3 lak tylli ki Branch Post Office, ka iarap ïa ki nongtrei iing dak bad ki Gramin Dak Sevak ban pynïaid ïa ka POSB, PLI/RPLI, ki kam phah kot bad ki parcel lyngba ka digital interface kaba shngaiñ. Ka application ka kynthup ia ki jingshakri ba la pynshong nongrim ha ka OTP bad ka jingpynshisha kaba ar bynta ban kyntiew ia ka jingshngain bad jingtreikam.
Haba ai jingkren halor ka jingkylla jong ka Tnad Post, u Dr. Chandra Sekhar Pemmasani u la ong ba kane ka tnad ka la mad ïa ki jingkylla kiba khraw ha kine ki ar snem ba la dep, da kaba pynleit jingmut ha ka jingkyntiew ïa ka teknoloji, ka jingpynkylla ïa ki polisi, ka rukom treikam kaba seisoh bad ki jingdon jingem kiba katkum ka juk mynta.
U la ban jur ia ki sienjam kiba thmu ban pyniar ia ka jingtreikam jong ka Rural Postal Life Insurance bad ban pynkhlain ia ki jingshakri kiba peit ia ka bha ka miat jong ki briew. U la ban jur ruh halor ka jingkitkhlieh, ka jingpynlut bad ka jingai jinghikai kaba ïahap bad ka jingthmu jong ka Viksit Bharat.
Kum shi bynta jong ka jingpynthymmai, la pynthymmai palat 110 tylli ki iing dak hapoh ki skulbah, katba kumba 40 tylli ki iing dak la plie ha ki nongbah kiba kongsan. Palat 5,700 tylli ki core hapoh ka ABT 2.0 ba la pynshong nongrim ha ka desktop ki plie lad ban peit bniah mardor ïa ki mar bad ka jingbuddien shaduh ki jaka ba jngai tam, ha kaba ïa kane ka rukom treikam mynta la pynïasoh lang bad ki application Dak Seva bad Dak MITRA.
Ka India Post ka dang iai bteng ban don ka bynta kaba khraw ha kaba kynthup lang ia baroh ha ka kam pisa tyngka bad ka jingpynpoi ia ki lad jingshakri shaduh ki jaka ba jngai tam, da kaba don kumba 40 klur tylli ki Account jong ka Post Office Savings Bank bad 4 klur tylli ki Sukanya Samriddhi Account. Ka Tnad ka pyniaid ruh kumba 7.5 klur ki parcel bad 90 klur ki mar ba phah da ka registered post bad speed post man la u snem.
Ka jingpynthymmai bad jingplie paidbah lyngba ka bor internet ïa ka Shillong GPO ka dei u mawmer ba kongsan na ka bynta ka jylla Meghalaya, kaba pynkhlaiñ shuh shuh ïa ki jingdon jingem ba iadei bad ka kam iing dak kiba lah ban ïoh da ki nongshong shnong ha Shillong bad ki jaka ba marjan. Ka jaka ba la pynthymmai, ryngkat bad ki sienjam digital jong ka Tnad, la khmih lynti ba kan ai ïa ka jingshakri kaba kham suk bad kaba pyndonkam da ka teknoloji na ka bynta ki briew.
Kane ka sienjam ka pynskhem ruh ia ka bynta jong ka India Post kum ka atiar ba kongsan jong ka jingai jingshakri ia ki paidbah ha ka jylla Meghalaya bad ka thain shatei lammihngi baroh kawei, da kaba pyniasoh lang ia ka teknoloji bad ki jingdon jingem kiba katkum ka juk mynta ryngkat bad ka jingshimkhia jong ka ban ioh ia ki jingshakri kiba lah ban ioh, kiba kynthup lang ia baroh bad kiba pynshong nongrim ha ki nongshong shnong.
