Shillong,Nailar 26: U Symbud myntri rangbah ba dei peit ia ka tnad kam kit kam bah u bah Sniawbhalang Dhar haba jubab ia ka jingkylli jong ka Miani D.Shira u la ong ba ka Airport Authority ka Ri India kala pynkhreh ban pynheh ia ka kad liengsuin Baljek ha Tura khnang ba ki aeroplane ATR – 72 / Q – 400 bad ki liengsuin A-320 ki lah ban hiar ha katei ka kad liengsuin.
La iathuh ba ka sorkar Meghalaya bad ka AAI kila iasoi ia ka soskular ia sngewthuh jingmut ha ka 06/05/2025 bad mynta ki dang iakren ba ka AAI kan shimti noh ban pynbha bad ban pyniaid ia katei ka kad liengsuin, Na ka liang jong ka sorkar kan shim ia ki lad ki lynti ban shim jaka shuh ban pynheh ia katei ka kad liengsuin.
Haba jubab ia ka jingkylli bynrap u myntri rangbah ka jylla u la ong ba ka AAI kala mynjur ban shimti bad ban pyniaid bad ia ka soskular yn sa lah ban iasoi ha u bnai Nailur u ban wan.Ka jingiakren katba ka AAI ka dang pynbha yn sdang ban pynher ia ki liengsuin kiba ngiam ban shong briew 19 ngut.
U myntri rangbha u la ong hadien ba ynda la dep ban iasoi ia ka soskular kan shim por hapdeng phra bad khyndai bnai ban maramot ia ki iing ki sem kiba la duh ha kad liengsuin Baljek Airport. Hadien ba la dep ka jingmaramot yn sa lah ban pyniaid ia ki liengsuin ki ban kit 19 ngut ha kajuh ka por yn dang shna ban pynheh ia katei ka kad liengsuin.Ka sorkar ka la dep mang pisa T.65 klur/- ban shim sa 94 acre ka jaka.
