Shillong, Nailar 27: Ki Muktiar ka jylla Meghalaya kiba kynthup ia ka High Court Meghalaya Bar Association bad ka Shillong Bar Association mynta ka sngi 27/Nailar/2026 kila pynlong ia ka jingiaid paidbah da kaba sdang najan Civil Hospital sha Barik, Malki Point phai sha MPSC Lower Lachuiemre poi biang shajan Civil hospital bad pynkut ha khmat ophis jong ka High Court Meghalaya Bar Association.
Ka jingpynlong ia kane ka jingiakhih jong ki muktiar ka jylla Meghalaya ha kane ka nongbah Shillong ka long ban dawa na ka sorkar ba dei ban weng mardor ia u Amit Kumar kum u Advocate General ka jylla Meghalaya, ha kane ka jingiaid paidbah palat hajar ngut ki muktiar kila iawan ban ia shim bynta na ki 12 tylli ki distrik ha ka jylla.
Haba kren ha ki lat pathai khubor u secretary ka Shillong Bar Association u muktiar T.L Jyrwa u la ong kane ka jingdawa jong ki muktiar ba ka sorkar ka dei ban weng noh ia u Amit kumar kum u Advocate General ka jylla ka long halor ka jingkynthoh ka jong u ha iing bishar ba ki kynthei kim shngain ha Shillong Bar, kane ka jingkren kala pynmong ia ki muktiar namar kam ju don kum kata.
La iathuh ba kala don ka jingkynnoh pyrshah ia u wei u muktiar ba u la leh khlem akor ia kawei ka khynnah kaba dang shah hikai ha kane ka kam kane kala jia ha ka chamber jong u riew shimet kam dei hapoh Shillong Bar hynrei kaba sngewsih bala don ki seng bhalang kiba la pyniaid ha khmat paidbah bad shoh bad dat bad aiti pat ha Sardar Police Station.
Halor kane kum ki muktiar kila ujor sha ka Chief Justice ka High Court Meghalaya bad ka iing bishar ba don burom kala rejister mokotduma bad ha ka jingshong bishar la ong ba u Advocate General u ba iasaid na ka bynta ka sorkar u la kynnoh ba ki muktiar kynthei kim shngain ha Shillong Bar, dei kane kaba la pynbitar ia ki ban pynlong ba kin dawa ban weng noh ia u Amit Kumar na ka kam kum u Advocate General.
