Shillong, Nailar 27: U myntri ka tnad rep u Timothy D.Shira haba jubad ia ka jingkylli ba la wanrah da u bah Arden Miller Basaiawmoit ba ka jingdie ia ki dawai sboh la die katkum ka Fertilizer (Control) Order 1985 bad ia kane la pyntreikam ha baroh kawei ka jylla.
Ki Inspector ki leit ban jurip ia ki dukan ba la ioh jingbit na ka sorkar ban die ia ki dawai sboh bad ka jingdie ia ki sboh dawai ka long lyngba ka Point of Sale kaba la pyniasoh sha ka portal iFMS bad ia mynta ia ka Frame Work for Fertilizer Sale la plie ha ri Bhoi District.
Ban iada ia ki nongrep u myntri u la ong ba ia ka, sboh dawai la die tang ha ki dukan ba la ioh license na ka sorkar, ka MECOFED ka die ia ka sboh dawai sha ki nongrep hadien ba kila ioh ia ki jingthoh na ki District Agriculture Officer bad la ju pynlong ruh ia ka jingleit khynra syndet syndet khnang ba kan nym don kano kano ka jingshah khniot ki nongrep.
Haba jubad ia ka jingkylli bynrap u myntri rangbah ka jylla u la ong ba ka sorkar kala ia ialeh ban nym pynshlur shuh ia ki nongrep ban pyndonkam ia ki sboh dawai, kumba ka long mynta ia ki sboh dawai lah ban pyndonkam tang ha kito ki jaka kiba la dep pynbna da ka sorkar namar ka sorkar ka pynshlur ban rep khlem da pyndonkam ia ki sboh dawai.
Kumba ka long mynta ka dor sboh dawai ka Urea ka dor sorkar ka long T.4,061/- katba ka SSP ka dei T.5,136/- kane ka long ha ka shi ton bad ka sorkar ka ai subsidi 25% na ka dor iew halor ka jingong ba ka don ka jingdie tam na ka dor ba la buh u myntri rangbah u la ong ba kata kala dei ka jingiadie tuh hynrei ka sorkar kala shim ia ki lad ki lynti baroh ba kan nym don ka jingiadie tuh ia ki dawai sboh.
