New Delhi, Sept, 05: U Vice-President ka Ri India, u C. P. Radhakrishnan, un sa wan jngoh iaka jylla Assam, Meghalaya, Manipur bad Arunachal Pradesh ha kine ki saw sngi kata naduh 6 haduh 9 tarik, Nailur 2026.
Ha katei ka jingwan jong u, u Vice-President un sa iashim bynta ha kiba bun ki liang jong ka riti ka dustur, kam pule puthi bad kynduh paidbah, halor kane un sa leit jngoh iaki jaka ba don ka jingiadei bad ka histori bad ki jaka ba iadei bad ka ri.
Ha ka 6 tarik, Nailur, u Radhakrishnan un sa poi ha Guwahati, Assam bad un sa don bynta ha kaban rakhe iaka Golden Jubilee jong ka Geetanagar College, kaba la tip mynta kum ka Kanya Mahavidyalaya. Hadien katei, un sa leit ha ka Convocation Ceremony jong ka Srimanta Sankaradeva University of Health Sciences (SSUHS), Guwahati.
Katba ha ka 7 tarik, Nailur, un sa don ha ka prokram ban buh maw nongrim ha Gauhati University, kaba bud da ka jingiakren bad ki samla pule, nongtrei bad ki paidbah ba ialam khmat ha University’s Convention Centre. Hadien katei, un sa wan ha ka nongbah Shillong, Meghalaya, ha kaba un sa don bynta ha ka prokram jong ki paidbah bad ka riti ka dustur ha Soso Tham Auditorium.
Ha ka 8 tarik, Nailur, u Radhakrishnan un sa leit sha Imphal, Manipur bad leit jngoh iaka INA Museum bad ka War Memorial ha Moirang bad Sainik School Imphal bad hadien kane, un sa leit sa sha Itanagar, Arunachal Pradesh.
Ha ka 9 tarik, Nailur, u Radhakrishnan un sa don bynta ha kawei ka prokram ba kyrpang jong ka Arunachal Pradesh Legislative Assembly bad leit jngoh iaka Assembly Gallery-cum-Museum. Un sa leit ruh ha Nyedar Namlo, Jawaharlal Nehru State Museum kaba don ha Itanagar bad ha Donyi Polo Mission School na ka bynta ban leit peit ia kiba duna ha ka bor iohsngew bad ka bor ban iohi.
