Shillong, Nailur 12: Ka seng ki nonghikai ka Meghalaya Schools Welfare Development Association seng kmie (MSWDA-CB), kam sngewiahap iaka jingdawa ka seng sain pyrthei Voice Of The Peoples’ Party ban weng ia u Vijay Kumar Mantri, IAS na ka kam Commissioner bad Secretary ka tnad pule puthi.
U President ka MSWDA u bah H. M. Marbaniang u la ong ba kum ka seng kam sngewiahap iaka jingdawa u president ka VPP ban weng ia u commissioner secretary ka tnad pule puthi, la ong lada don kano kano ka jingbym ia hap ha ka polisi treikam dei ban don da ka jingiakren ym ban pynlong soh pdung ia u ophisar ba pyntrei kam iaki rai jong ka sorkar.
U bah Marbaniang u la ong ba ha kine ki snem ka jingdon jong u Vijay Kumar, Commissioner bad Secretary la iohi iaka jingkhih ha kaba iadei bad ka pule puthi ka jylla bad man ka por ki jingiakren kumno ban pynbha iaka jingpule ha ka jylla ym kumba la kynnoh.
U la ong ba ha kine ki snem kiba la dep la iohi ba ki nonghikai kila mih ha surok ban dawa na ka sorkar ban siew kajuh ka jingsiew haba ki trei ia kajuh ka kam, hynrei mynta ka sorkar kala wanrah iaka rukom siew kaba thymmai watla ka jingsiew kam pat long ba biang hynrei kaba sngewtynnad kam don shuh kata ka jingpher iaki nonghikai kiba bun jait.
Kane ka jingsiew thymmai iaka tulop la pynwan dur katkum ka por kaba ki trei kala wanrah iaka jingiapdiang lang watla ki tip shai ba ka dang duna hynrei kane ka jinglah ban pynbeit ryntih ka long ka jingsdang ban pynwan dur iaka jingsiew iaki nonghikai.
