Tura, Nailur 21 : Kum ka lad ban kyntiew ia ka jingsumar ia ki Kmie bad ki Khunlung ha ri-lum Garo, u Myntri Rangbah Conrad K Sangma ha ka sngi Nyngkong, ula plie paidbah ia ka annex building ba dang shu dep shna thymmai ba 50 jingthiah hapoh ka District Maternity & Child Hospital (DMCH), Tura.
Ha kane ka prokram la iashimbynta da u Sampath Kumar, IAS, Additional Chief Secretary ka Sorkar Jylla, u Vibhor Aggarwal, IAS, Deputy Commissioner ka West Garo Hills, ki Heh Ophisar ka Tnad ka Koit ka Khiah, ki Doktor bad kiwei ki kynrem ki lyndan.
Kane ka jingtei ba thymmai la khmih lynti ba kan nang pynkhlain ia ka jinglah ban ai ia ka jingsumar kaba kham bha ia ki Kmie bad ki Khunlung hapoh ka hospital. Kan iarap ban pynjanai ia ka jingsumar ia ki nongpang, pynduna ia ka jingkhap ngiah ha ka jingdon ki nongpang bad pynthikna ia ki lad ai jingsumar ba kham bha na ka bynta ki Kmie bad ki Khunlung khynnah ha ka thain.
Ha kane ka jingialang, u Myntri Rangbah ula pyllait bad sam ruh ia ki Mother & Child Care Kits sha ki nongioh bynta kiba shah sumar hapoh ka hospital.
Haba ai jingkren, u Myntri Rangbah ula ai khublei ia ka Tnad ka Koit ka Khiah bad ban jur ba ka jingiada ia ka jingim ka dei ka jingkitkhlieh lang jong baroh. Ula iathuh ba naduh u 2018, ka Sorkar kala buh hakhmat eh sha ka kam shakri ia ka imlang sahlang, naduh ka koit ka khiah, ka pule dangle bad ka bhah ka miat ka imlang sahlang kaba kot ia shibynta na ka saw bynta jong ka mangtyngka ka Jylla. Tang ka pule puthi marwei, u ong,kala ioh ia ka mang tyngka ba kot T.3000-T.3500 klur shisnem.
Ula ban jur ia ka jingkongsan ban pyndonkam bha ia ki jingdon jingem, haba pynpaw ba ka roi ka par kam dei eh tang halor ka jingpynlut ia ka pisa hynrei ban pynthikna ba ki jingpynlut kin ai ia ki jingmih kiba lah ban thew. Haba shim ia ka koit ka khiah bad ka pule dangle kum ka mat kaba bun jyrwit jyrwat bha, ula ong ba ka jingkynshew ha kine ki kam ka ju shimpor hapdeng san haduh shiphew snem ban iohi ia u soh.
Haba kren halor ki jingjop ka Jylla, u Conrad ula ong ba ka Meghalaya kala iohi ia ka jinghiar kaba bun eh ha ka jingiap ki Kmie ba kha khun hapoh ka Ri, kaba kot haduh 55% ka jinghiar. Hynrei, ula ban jur ba ka thong kaba khatduh hi ka dei ban long nod ka jingiap ki Kmie bad ki Khunlung.
U Myntri Rangbah ula pynpaw ruh ba ka Mother & Child Health Model ka Jylla kala ioh ia ka jingithuh hapoh ka ri bad pyntip ba ula shah khot ban ai ka jingbatai ia kane ka rukom treikam hakhmat u Myntri Rangbah Duh ka ri, kaba long ka khyllipmat kaba sngew sarong ia ka Jylla.
Ula bynrap ba ki dang don bun ki project ka koit ka khiah kiba dang pynkhreh mynta hapoh ka PM-DevINE scheme nalor ka jingthmu ban nang pynheh ia ka Mother & Child Hospital.
Kiwei pat kiba la ai jingkren ki kynthup ia u Sampath Kumar, Dr. P. Chyne, Director of Health Services (MCH & FW), kiba la pynpaw ia ka jingsngewnguh ia u Myntri Rangbah namar ka jingkyrshan ba khlem sangeh bad ka jingkut jingmut ban nang pynkhlain ia ka jingshakri ha ka koit ka khiah ha Meghalaya.
