Shillong, Nailur, 24: Ka National Book Trust kaba dei shi bynta jong ka tnad pule puthi ka sorkar pdeng ha ka sien kaba lai kan pynlong iaka iew die kot kaba hynriew sngi ka ban sdang la shai ka sngi 25/Nailur/2026 bad kan kut 01/Risaw/ 2026 ha State Central Library, Shillong ha kaba ki nongdie kot na kylleng ka Ri India kin wan ban iashim bynta.
Ka Dr. Camelia Doreen Lyngwa, MCS kaba dei ka Director ka tnad pynneh riti dustur ka sokar jylla haba kren ha ki lad pathai khubor ha Shillong Press Club, kala ai khublei iaka National Book Trust ka sorkar pdeng kaba la jied iaka nongbah Shillong ban pynlong biang sa shisien iaka iew die kot.
Ka Dr. Camelia kala ong ba ha kane ka juk ba ki khynnah kila ngop ha ki rynsan social media bad ki kor ki bor kompiwtar, kane ka jingwan ka National Book Trust kan long ka jingmyntoi namar ki don haduh 80 tylli ki dukan die kot ha kaba kin don ki jait kot kiba har rukom ba ki lah ban ioh ha kane ka iew die kot.
U Rakesh Yadav uba dei u Joint Director ka National Book Trust u la ong ba ha u snem 2024 ha ka por ba ki pynlong ia kane ka iew die kot, u dap da ka jingsngew kmen haba u iohi ba bun ki skul ki wan ban ialam iaki khynnah skul sha kane ka iew die kot bad u don kajuh ka jingkhmih lynti ha kane ka kynti ba mynta ruh.
Ka jingplie ia kane ka iew die kot ba hynriew sngi kan long lashai ka sngi ia kaba yn sa plie da u Myntri ka tnad pynneh riti dustur ka sorkar Meghalaya, u bah Sanbor Shullai bad ia baroh ki kot, yn die ha ka dor ba duna da 10 persen.
