Shillong, Nailur, 24: Mynta ka sngi ki nongialam jong ka All Khasi Hills A.chik Joint Action Committee kala ai da ka dorkhas ha u Chief Secretary ka jylla u Dr. Shakil Ahmed ban kyntu iaka sorkar ban pynrung iaka ktien Garo ha ki eksam jong ki District Selection Committee bad ban pyntreikam iaka polisi bhah kam bad iaka roster.
U John D. Sangma u nongialam ka seng haba kren ha ki lad pathai khubor, hadien ka jingiakynduh ia u Chief Secretary bad iaka kong Isawanda Laloo u la ong ba ha Khasi bad Jaintia Hills ki nongshong shnong kiba dei na ka jaidbynriew Garo ki don palat iaka 4 lak kumta ka sorkar ka dei ban pynrung iaka ktien Garo ha ki eksam DSC.
Ki jaidbynriew Garo kiba don ha Khasi bad Jaintia ki dei ki nongshong shnong ba pura kumta la donkam ban pynrung iaka ktien Garo khnang ba kin lah ban shim bynta ha ki eksam wad kam wad jam ha ki distrik.
Ka dei ka jingshisha ba ha ka Reservation Policy ka jingbhah kam ka long 40 iaki Garo, bad 40 iaki Khasi bad Jaintia bad ha ki DSC la buh iaka kyndon ba kiba aplai kam ki dei ban nang iaka ktien jong kato ka jaka. Kumta namar ka ktien Garo bad Khasi kila long ki ktien sorkar kumta la dei ban pynrung ha ki eksam DSC.
Utei u nongialam u la iathuh ba hadien ba kila iakynduh ia u Chief Secretary la bthah iaki ban iakynduh iaka kong Isawanda Laloo IAS bad ha kane ka jingiakren, ka don ka jingkyrmen namar kila ai ka jingkular ba kin sa bishar bniah ia kane ka jingdawa.
