Shillong, Nailur 24: Ka jingialang jong ka State-Level Unique Identification Implementation Committee (UIDIC) na ka bynta u snem 2026 ka la long mynta ka sngi ha Shillong ban peit bniah ia ka jingiaid shaphrang jong ka jingpynrung kyrteng Aadhaar, ka jingpynthymmai bad ka jingpynshisha ha ka jylla Meghalaya bad ban ithuh ia ki bynta ba hakhmat eh na ka bynta ban kyntiew ia ka jingpynbiang ha baroh kawei ka Jylla.
Ïa kane ka jingïalang la pynïaid da u Dr. Shakil P. Ahammed, Chief Secretary ka Jylla Meghalaya, ha kaba la wan ban ïashim bynta da u Ngachan Zimik, Deputy Director General ka Unique Identification Authority of India (UIDAI), bad u Lt. Col. Swapan Kumar Saxena, Director, UIDAI, ryngkat bad ki heh ophisar jong ka Sorkar Meghalaya.
Ha kane ka jingiakynduh, u Ngachan Zimik, DDG, UIDAI, u la ai ia ka jingbatai kaba bniah halor ka jinglong jingman jong ka jingpynrung kyrteng bad jingpyndonkam ia u Aadhaar ha ka jylla Meghalaya. U la ban jur ïa ka jingkiew ha ka jingpynrung kyrteng Aadhaar, ki jingpynthymmai ïa ka jingtip shaphang ka jingbun briew bad ka jingpynshisha ha kylleng ka Jylla, katba u dang ithuh ïa ki bynta ba kongsan kiba donkam ïa ki sienjam ba bniah.
Kawei na ki bynta ba kongsan ba la ban jur ka long ka jingdonkam ban pynkloi ïa ka jingpynrung kyrteng Aadhaar hapdeng ki khynnah ha ka rta 0–5 snem lyngba ka Birth Registration Based Aadhaar Enrolment (BRBAE) ha ki hospital jong ka distrik bad kiwei kiwei ki jaka sumar, da kaba pyndonkam ïa u Birth Registration Number (BRN).
Ka jingialang ka la ban jur ruh ia ka jingdonkam ban kyntiew ia ka jingpynrung kyrteng Aadhaar ha ki district kiba duna bad ban pynkhlain ia ka jingpynbiang ia ka Mandatory Biometric Update (MBU) hapdeng ki khynnah. La pynshlur ia ka Tnad School Education ban pynlong ia ki prokram MBU ba kyrpang ha ki skul ban pynsuk ia ka jingpynthymmai ia ka biometric ha ka por kaba biang.
Ka DDG ka la ai jingmut ban pyniasoh ia ka kyrdan MBU bad ka portal UDISE+ khnang ba ki skul kin lah ban ithuh ia ki khynnah skul kiba donkam ia ki jingpynkylla ia ka biometric kaba donkam. U la ban jur ruh ïa ka jingdonkam ban pynthikna ban pyndonkam pura ïa ki tiar pynrung kyrteng Aadhaar kiba don khnang ban pynsted ïa ka jingpynpoi ïa ka MBU ha kylleng ka Jylla.
Haba kren shaphang ka jingdonkam jong k jingpynthymmai ïa ki biometric, u Zimik u la ong ba ka jingpynthymmai ïa ki biometric ha ka por kaba biang ka lah ban ïarap ïa ki samla pule ban lait na ki jingeh kiba ïadei bad ka jingpynshisha katba ki dang ïoh ïa ki skhim jong ka sorkar bad ki scholarship bad ban iakhun ia ki eksamin kum ka NEET, JEE bad CUET.
Ha kane ka jingïalang la ïakren ruh halor ka lad ban pynkylla digital ïa ki kot ki sla kiba la pynmih da ka Sorkar Jylla bad ban kynthup ïa ki QR code khnang ban pynsuk ban pynshisha ïa ka jingshisha jong kum kine ki kot ki sla. La iakren ruh ia ka jingpyniar ia ka jingpynshisha ia u Aadhaar na ka bynta ka jingpynpoi ia ki jingshakri sorkar kaba shai bad kaba paka.
Kawei pat ka jingthmu ba kongsan kadei ka Aadhaar App kaba thymmai, ha kaba u DDG u la batai ia ki jingdonkam jong ka bad ki jingpyndonkam kiba lah ban wan. Kine ki kynthup ïa ka jingpynshisha ba la pynshong nongrim ha ka internet bad ka QR, ki lad khang badplie da ka biometric bad ka jingpynrung kaba suk ïa ki kynhun Offline Verification Seeking Entity (OVSE).
Kum kine ki jingdonkam ki lah ban pynsuk ia ka jingpynshisha kaba pynshong nongrim ha u Aadhaar ha ki bynta kum ki jingleit sah ha ki hotel, ki hospital bad ka jingpynshisha ia ka rta, nalor kiwei pat ki jingpyndonkam.
Ki jingiakren ki la ban jur ia ka jingdonkam jong ka jingiatreilang kaba iaineh hapdeng ki tnad Sorkar Jylla bad ka UIDAI ban pynkhlain ia ka jingpyndonkam ia u Aadhaar, ban pynsuk ia ki biometric update ha ka por bad ban pyniar ia ka jingpyndonkam ia ka jingpynshisha ia u Aadhaar na ka bynta ka jingai jingshakri kaba paka.
Haba pynkut ïa ka jingïalang, u Dr. Shakil P. Ahammed, Chief Secretary ka Jylla, u la ban jur ïa ka jingdonkam ban ïatreilang da baroh ki tnad ba dei peit ha ka jingïatreilang bad ka UIDAI Regional Office, Guwahati, ban weng ïa ki jingduna ba la ithuh bad ban ïoh ïa ki jingmih ba thmu ha ka por kaba biang.
Ha kane ka sngi la donlang ruh ki heh duh bad ki heh ophisar na ki tnad bapher bapher jong ka Sorkar Jylla, ba kynthup ïa u Pravin Bakshi, Commissioner & Secretary, IT, FCS & SWD, bad u Swapnil Tembe, Secretary, GAD (B), Nodal Department.
