Shillong, Nailur 30: Hadien ka jing ioh jingtip kaba tikna ba ka don ka wei ka Bus kaba kit iaki bar jylla kiba wan napoh ka Jylla Assam ban rung shapoh ka Jylla Meghalaya kumta na ka liang ki nongialam ka Seng Khasi Student’s Union lyngba ka KSU Umsning Circle ha ryngkat ka jingiatreilang bad ka KSU Nongpoh Circle, ki lah ioh bat ia katei ka Bus ha Surok Bah National Highway 6 haka por 12:30 mynstep kaba dei haka por shiteng synnia haka shnong Umsamlem Ri Bhoi District bad kaba don ia u Registration Number AS 15 AC 1929 kaba kit iaki 42 ngut ki bar jylla ki bym don ia ki kot ki sla kiba biang bad naka liang ka Seng kala pynphai noh iakine ki bar jylla sha ka jaka kaba ki wan.
Ka Seng ka dap da ka jing sngew lyngoh bad jing sngew khia mynsiem haba ia dei bad ka jingioh rung laitluid ki bar jylla khlem kino kino ki kot ki sla kiba biang.Ka Seng ka dap ruh ia ka jingbitar ia ka jingdon ki Myndie Ri kiba ju mlien ban ialam bad synran ia kum kine ki bar jylla,ka Seng ka kren ia kane namar haba tohkit ia kine ki bar jylla,ki lah phla ba don u wei u briew uba ialam bad synran ia kine ki bar jylla ba kin rung suk sha kane ka jylla jong ngi,bad haba tohkit ia kine ki briew,ka Seng ka la ioh ruh ia ka jingtip ia u ne u briew u ba ialam ia kine bad na ka liang ka Seng,kan shim khia bad wad ia une u briew khang ban ioh ban Leh ia kaba donkam.
Ka seng ka suba ruh ba ka jingwan kine ki bar jylla sha ka jylla ka lah ban long ruh ba ki thmu ban leit trei sha ka thain East Jaintia haba ki bun ki kharkhana dew bilat shatei kiba wanrah ia kine ki nongtrei bar jylla ha ka dor kaba duna haba ia nujor bad ki trai jylla ?hynrei ka jingwan jong ki hi ka long kaba beaiñ bad khamtam ba pynkheim iaka aiñ Meghalaya Identification, Registration (Safety & Security) of Migrant Workers Act, 2020 (MIRSS) kaba ka seng ka la dawa nanka sorkar ban pyntreikam pura bad ka jing kam ka sorkar ba ka la trei kam pura.
Ka seng lyngba kum kine ki jinglaitlan ka pynpaw ba ka aiñ ka dei ban treikam ha madan um tang ha ki kot khubor. Kane ka jingjia kan pynlong iaka seng ha ki sngi ban wan ban leit khynra iaki bar jylla kiba wan trei sha ka jylla ba hato ki wan bad rung na ka jingkhang na khmat ne ki rung nadien.
Ha kane jingioh bat iaki Bar Jylla la ialam da u President ka KSU Umsning Circle,u Samla Lester Nongbet haka jingiadon lang u President ka KSU Nongpoh Circle u Samla John Lyngdoh lem bad ki dkhot jong kitei ki Circle.
