Shillong, Nailur 30: Ka Bor Pyniaid District jong ka West Khasi Hills, ka dang pyniaid ia ka jingthung kam ia ki Nos Contractual na ka bynta ka MCH Hospital Nongstoin kat kum ka rukom kaba ju leh. Ka written exam la pynlong ha Nognstoin College ha ka 21 tarik u September 2026.
Kat kum ka results jong ka, 60 ngut ki candidate lah shim ban ai ia ka Personal Interview kumba lah pynmih da ka ophis jong ka District Medical and Health Officer ha ka 24 tarik Spetember 2026. Ia ka Interview lah buh ban pyunlong ha ka 29 tarik bad 30 tarik ha ka kamra conference jong ka ophis ka Deputy Commissioner da ka kynhun nong interview ba lah shna kyrpang.
Ha ka 29 tarik Spetember 2026, katba ka interview ka dang iaid, U MDC ka Nongstoin, u lah rung jubor shapoh ka kamra interview khlem da pan jingbit bad da kaba kren da ka sur kaba jam ia ki nongshim interview ha khmat ka jingdon ryngkat jong iba shah interview ruh.
La pynthud ia ka jing leh interview bad lah pyn sier ia ki nongai interview bad nongshim interview. Ia U MDC lah synran noh da ki pulit sha ka kamra ka DC, ha kaba u lah kynthoh shaphang ka jingthung kam, bad ia ki khubor kiba la mih ha ki social media ruh.
Ka Bor Pyniaid District ka pynrem jur ia kane ka jingrung jubor bad jing pynthud jong ka ki ophisar kiba dang leh ia ka kam ophis kaba donkam. Ka kynhun ki nonginterview ka ba dang leh ia ka kam ka jong ka ka dei ban ioh ban pyndep lait luid ia ka kam ba la bynshet ha ka khlem kano kano ka jingpynwit.
Ym don mano mano, ba bad kano kano ka kyrdan u ba lah ban rung sha ka jaka interview khlem da ioh bor lane pynthud ia ki ophisar ban pyndep ia ki kamram ki jong ki.
Kane ka jing leh ka pynwit bad pynthud ïa ki nongthep kam kiba la pynkhreh bha bad da ka jingshisha. Ka Bor Pyniaid District ka dang bishar bniah ïa kane ka jingjia bad kan shim ïa ki sienjam kiba donkam katkum ka aiñ.
Kino kino ki jingsngewkhia halor ka jingkhot thgunkam ki dei ban ai da ka jingthoh, ryngkat bad ki jingtip kiba bniah bad ki sakhi kiba don, sha ka bor ba dei peit. Uno uno uba don jingtip halor ka jingdawa pisa ne kano kano ka jingleh bymhok ha kane ka jingpynrung kam u lah ban pyntip sha ka Deputy Commissioner, West Khasi Hills. Baroh ki jingujor kin shah bishar bniah bad yn shim ïa ka sienjam pyrshah ïa kino kino kiba lap ba ki donkti, katkum ka aiñ.
La pyntip sha ki nongthep kam bad sha ki paidbah ba ka jingjied kan long katkum ka merit, kaba la bishar lyngba ka Written Examination bad ka Personal Interview. Ym donkam ban siew kano kano ka pisa ha kano kano ka bynta jong ka jingpynrung kam.
La maham ïa ki nongthep kam ba kin ym ngop ha ki buit jong kino kino ki briew kiba shim kabu, ne kino kino kiba kam ba ki lah ban pynïaid ïa ka jingjied. Lada don kino kino kiba wan sha ki nongthep kam da kum katei ka jingkam, ki dei ban pyntip mardor sha ka Ka Bor Pyniaid District. Ka jingpynrung kam yn pyndep ha ka rukom kaba hok, kaba shai bad kaba khuid, bad hapoh ka por ba la buh.
Ka Bor Pyniaid District ka kyrpad ïa ki paidbah bad baroh kiba don bynta ha kane ka kam ban ai ka jingïatreilang, khnang ban pynthikna ba ka jingpynrung kam kan ïaid beit bad yn lah ban pyndep ïa ka hapoh ka por ba la buh. Kane kan pynlah ïa ka MCH Hospital, Nongstoiñ, ban sdang treikam noh kloi bad ban ai ïa ki jingshakri ka koit ka khiah kaba donkam bha sha ki paidbah jong kane ka thaiñ.
