New Delhi, Nailur, 30 : Ka sorkar Meghalaya bad ka United Nations World Food Programme (WFP) kala rai ban pynskhem ka iatreilang jong ki mynta ka sngi halor ka jingshngain ka bam, jingkoit jingkhiah bad ka bhah ne ki thup kam kiba iadei banyngkong lyngba ka jingsoi iaka jingpynkylla iaka soskular kaba lah don lypa hapdeng kine ki ar tylli ki kynhun.
Ia katei ka jingia soi, la long ha WFP Head Office ha New Delhi ha ka jingdon lang u Myntri Food, Civil Supplies bad Consumer Affairs, sorkar Meghalaya, u bah Methodious Dkhar.
Ia ka soskular, la dep soi da ka bynta jong ka sorkar Meghalaya da u Pravin Bakshi, IAS, Commissioner & Secretary, Department of Food, Civil Supplies and Consumer Affairs (FCSCA) bad ka Elisabeth Faure, kaba dei ka nongmihkhmat bad Country Director ka WFP India, na ka bynta ka WFP.
Katba ki nongmihkhmat jong ka sorkar Meghalaya ki kynthup iaka kong I. Mawlong, IAS, Director, FCSCA; ka kong B. Syiemlieh, Under Secretary, FCSCA; bad u bah S. K. War, OSD, FCSCA. WFP kila don lang bad u Ankit Sood bad u Rodrick John.
Katei ka jingiatreilang ka tei iaka jingia tylli hapdeng jong ka sorkar Meghalaya bad ka WFP naduh u snem 2022 ha ki jaka kynthup iaka jingshngain ka bam, ka jingmih ka rukom treikam ka Public Distribution System, ka rukom pynpoi iaki tiar, ka buit thymmai jong ka digital, ki jingshakri ne jingiarap iaki nongioh jingbit bad ka jingpynkhlain ne pynbit pynbiang iaka bor treikam jong ki kynhun.
Kane ka jingiatreilang kan pynkiew shuh shuh iaka jingiatreilang, buit thymmai, pynbit pynbiang iaka bor treikam jong ki kynhun bad ka rukom pynbiang iaka jingshngain ka bam ha ka jylla Meghalaya, ha kaba kan long jingrat dyngkhong iaka jingiap thngan bad ka jingkyrduh bam.
Kane ka jingia soi ka pyni pat sa kawei ka mawjam ha ka jingiatreilang hapdeng jong ka sorkar Meghalaya bad ka WFP ha kaban pynskhem iaka jingshngain ka bam bad ka bha ka miat jong ki paidbah ka jylla Meghalaya.
