Shillong, Nailur 30: Ka Rilbong kan rakhe ia ka jingdap 100 snem ka jinglehniam Durga Puja ha ka 15/Risaw/2026 da kaba pyndonburom ban ai da ka khusnam sha ki 25 ngut ki riew pawkhmat na ki kynhun jaitbynriew bapher bapher kiba la pynlong bad wanrah burom ia ka nongbah Shillong.
U Manas Choudhury u wei na ki nongkitkam haba kren ha ki lat pathai khubor ha Shillong Press Club u la ong ba kane ka jingpynkup burom ia kitei ki 25 ngut ki bym don shuh ha kane ka sla pyrthei kaba yn sa ai ia ka jingpynkup burom sha kiba haiing hasem bad ia ka kyrteng jong ki mynta.
U la ong ba ia kane ka jingrakhe ia ka jingdap shispah snem kin wan ki paralok kiba najan bad na jngai, u la ong ba ki don ki shi kurim ki ban wan naduh California ban iadon lang ha kane ka jingrakhe ba kin wan shim ia ka jingpynkup burom mutdur katno ka jingsngew kmen ka jong ki.
Ha kane ka jingrakhe kin wan ki briew na Maharashtra, Karnataka, Orissa, namar ki riewlum ym tang ba ki sah ha kane ka jylla Meghalaya hynrei ki don ruh ha kylleng ka ri India bad kine kin wan ban ia shim bynta ha ka shad ka kmen ban pyni ia ka riam tynrai jong ki ia kane la leh lyngba ka Indian Council Cultural Research.
U Manas u la ong ba kane ka jingrakhe kan long kaba kham kyrpang namar kam pat ju don koit ha ka nongbah Shillong ban kynmaw burom ia kito ki riew paw khmat ba pyllong ia ka nongbah Shillong kumba ka long mynta bad na ka liang ka Rilbong ki don ia ka jingsngew sarong ba kin sa lah ban leh ia kane.
Ha ka jingkren u bah D.P. Wahlang u la ong ba ia kine ki 25 ngut kila wad bniah ha kaba iadei bad ka jingdonkti ka jong ki ban kyntiew ia kane ka nongbah Shillong ha ki kam pynroi bad la khot ia ki bad kila pyntikna ba kin wan shim ia ka khusnam jong ki ha ka 14/Risaw/2026.
