Shillong, Nailur 30: Ka Seng hadien ba ka la ioh ia ka jingujor na ki bun ngut ki briew halor ka jingkynnoh dawa pisa beaiñ ki pulit Meghalaya ha ka National Highway ha Mawkhanu bad Thangshalai. Kumta ha 30 tarik Nailur, 2026 hapoh ka jingialam jong u Alerick Kharjana, Education Secretary ka KSU CEC, ka la leit hiar sha Diengpasoh bad Thanglaskai ban jurip halor kane ka kam bad la lap ba ka la long kaba shisha.Ki dkhot ka Seng ki la ring dur ban pynshisha halor kane ka kam bad la lah ban iohi ba ki pulit ki shim pisa na ka trok bad ka ladon ka jingiapynbeit ba baroh ki trok kiba kit ïa ki tiar, ki mar -poh khyndew, ki kali kit mar-bam ki hap ban siew sha ki pulit Meghalaya ïa ka pisa 200 haduh 500 tyngka shi trok.
Ka Seng ka don ka jingsuba ba ïa kane ka kam la pynbeit da ki heh pulit lym kumta kumno kine ki pulit kin nud ban dawa pisa kumne bad miet bad sngi bad ki nongniah trok ruh ki ai beit khlem artatien namar i kumba ladon ka jingpynbeit.
Ka jingkylli ba ka Seng ka kwah ban buh mynta ha khmat ki nongpyniaid ka East Khasi Hills District ka long ba mano ba aibor ïa kine ki pulit ba kin shim pisa na ki trok kumne.
Ka Sorkar jylla ka dei ban pynlong ia ka jing tohkit ba laitluid halor kane ka kam khnang ban lah ban rat dyngkhong ia kine ki jingleh bym shong nongrim ne shong ain̈ da ki riew bat ain̈.
Ka Seng ha kine ki sngi ban wan kin buh ïa ka jingujor ha khmat ki bor pyniaid. Kum kine ki jingjia ka pyni ïa ka jingbamsap kaba jur hapoh ka tnad pulit bad ka Seng ka rad dynkhong ïa kum kine ki kam bamsap kiba pyntlor ïa ka jylla ha ka roi ka par ha kaba ki mar bam mar dih ki kiew dor man la ka por.
Ka Seng ka dawa ba dei ban weng mardor ïa u SP ka East Khasi Hills District u Vivek Syiem uba la ailad ïa kum kane ka kam ban jia hapoh ka jingpeit ka jong u bad kumjuh ruh ïa u DC. Dei ban don ka jingtohkit kaba bniah halor kane ka kam.
Ka Seng kan dang iai pynjur ban pynlong ia kum kine ki talasi wat lada dei ki pulit ne ki briew jong ka aiñ kiba leh donbor.
