Shillong, Nailur 30: Ka seng ki trai trok bad ki nongniah trok kaba la tip kum ka All Meghalaya Truck Owner and Driver Welfare Association kila pynpaw ia ka jingsngewsih kaba khraw namar ki dribar trok kim ioh jaka ieng harud ka surok bah bad ki ju iai shah beh na ka por sha ka por ha ki pulit haba ki pynieng haba ki shongthait ha ka miet ka iong.
Haba kren ha ki lat pathai khubor ha Shillong Press Club u Vice President ka Seng u bah Dapkupar Nongrum u la iathuh ba u Laxmi Narayan Prasad u manager ka National Highways and Infrastructure Development Corporation Limited ha ka shithi kaba la phah sha u President ka seng u bah Wanshuwa Nongtdu la ong ba ki don ki jaka ieng ia ki trok kaba la tip kum ki Layby ha shi lynter ka surok na Molidor sha Jorabad.
Ha ka shithi kaba la phah na ka NHIDCL kala kdew shai ba na Jorabad sha Damsite la shah ia ki trok ba kin ieng ha ka surok bah barim na ka kilometer 0.00 haduh ka kilometers 61.800 jong ka surok bah NH-40 katba na Jowai sha Ratacherra la shah ia ki trok ba kin ieng na ka kilometer kaba 69 haduh 200 kilometers jong ka surok bah NH-44.
U bah Dapkupar u la ong ba ki trok kim ioh jaka ban ieng ha ki bynta jong ka Ri Bhoi District bad ki shah beh na ka por sha ka por ha ki pulit bad ka long kaba sngewsih ba kum ki nongniah trok ki mad ia ki jingeh bad ki trai trok ruh kumjuh dei halor kane ba kila phah ia ka shithi sha ka NHIDCL ban pan ia ka jingpynshai bad na ka liang ka NHIDCL ka la phah ia ka jubad bad kila leit ban jurip lang ba kin pyni ia ki jaka.
Na ka liang jong ka seng kala kyntu ia ka NHIDCL ba kin pynkhuid noh ia kito ki jaka kiba la mang ban ieng ki trok khnang ba kin ioh ban ieng, na ka liang ka seng ka la ong ba lada ka NHIDCL kam lah kum ka seng kan leit ban ia khih shong kyllain mungor ha khmat ka ophis ban pynbor ba ka dei ban pynkhuid ia kito ki jaka khnang ba ki draibar trok kin ioh ban pynieng ia ki kali.
