Shillong, Risaw 13: Ka Central Executive Committee (CEC) jong ka Jaiñtia National Council (JNC) ka la pynlong ïa ka jingjurip kaba kyndit ïa ki laisen khaii (trading Licence) bad Service Licence ha ka shnong Khliehriat West, kaba dei ka headquarter jong ka East Jaiñtia Hills District. Ia kane ka jingjurip la leh katkum ka kyndon jong ka JHADC Trading by Non-Tribal Rules, 2015, ha kaba la don lang ki nongtrei ka JHADC.
Haba kren ha ki lad pathai khubor, u General Secretary ka JNC CEC u bah Wanshwa Suting u la ïathuh ba kane ka jingleit jurip ka dei hadien ba lah iohi ia ka jingbun palat ki briew kiba nabar kiba pynïaid ïa ki dukan bad ki kam khaii ha East Jaiñtia Hills. Ka jingthmu ba kongsan jong ka, u la ong, ka long ban pynshisha la kine ki nongpyniaid ne jaka treikam ki don ne em ia ki laisen bad ki kot ki sla kiba biang.
“Ka jingbym don ia kum kine ki laisen bad ki kot ki sla ka dei kawei na ki daw bah kaba la pynlong ia ka jingduh khajna bad ka pisa ka JHADC”, la ong u bah Suting.
Katkum ka jingong u General Secretary ka JNC, ha ka jingjurip la lap babun hi ki dukan bad ki jaka treikam kim don ia ki laisen bad ki kot ki sla ba donkam, katba don pat kiba treikam beain khlem kano kano ka laisen ne ki kot ki sla kiba donkam.
U la ong ba kum kine ki rukom kim ktah tang ia ka khajna jong ka JHADC hynrei ka wanrah ruh ia ka jingeh kaba khraw ia ki briew trai ri, khamtam ha ka jingshah knieh ki kam ki jam, ki kam khaii kiba ki trai muluk ki lah ban leh.
Hadien ka jingjurip, ka seng kala khang ïa kiba bun tylli ki dukan bad ki kam kiba treikam khlem ki laisen bad ki kot ki sla ba donkam bad ka la pynmih ïa ki jingmaham kiba tyngeh ïa ki nongpynïaid bym dei ki riewlum. Ki heh jong ka JHADC ruh kiba don lang kila maham ruh ba yn leh da kaba tyngeh lada lap biang ia kiba treikam beaiñ.
U bah Wanshwa u la pynpaw shuh shuh ba ïa ki jaka treikam kiba don ïa ki laisen khaii kiba biang hynrei ki bym don ïa ki kot ki sla ba donkam la ai por shi taiew ban pynbiang ïa ki. Lada ym lah ban kohnguh hapoh ka por ba la buh, ka seng kan sa pynshitom da kaba tyngeh u la bynrap.
